Төрийн банк 2023 оны тогтвортой хөгжлийн тайлангаа танилцууллаа

      Төрийн банк нь байгальд ээлтэй, нийгмийн хариуцлагатай, ил тод, сайн засаглал бүхий үйл ажиллагааг эрхэмлэж, харилцагчдадаа банк, санхүүгийн бүх төрлийн үйлчилгээг хүртээмжтэй хүргэх эрхэм зорилгыг дэвшүүлэн ажилладаг билээ.

Тус зорилгынхоо хүрээнд бид хоёр дахь жилдээ олон улсын шаардлагад нийцүүлэн бэлтгэсэн Тогтвортой хөгжлийн тайлангаа олон нийтэд танилцууллаа. Энэхүү тайланд Төрийн банкны 2023 онд Байгаль орчин, нийгэм, засаглалын хүрээнд хийгдсэн ажлууд ололт, амжилт болон хэрэгжүүлсэн сайн туршлагуудаасаа хуваалцсан байгааг дуулгахад таатай байна.

Тайлант онд Төрийн банк нь Обзерв Консалтинг Зөвлөх үйлчилгээний байгууллагатай хамтран ажиллаж, олон улсын стандартын дагуу Хүлэмжийн хийн ялгаруулалтыг Хамрах хүрээ 1 болон 2-ын хүрээнд тооцсон. Хүлэмжийн хийн ялгаруулалтыг хэмжих нь уур амьсгалын өөрчлөлтийн эсрэг арга хэмжээ авах ажлын үндэс болж, цаашид хүлэмжийн хийн ялгаруулалтыг бууруулах, түүний нөлөөг тооцоход ихээхэн эерэг нөлөө үзүүлэх юм. Мөн Нэгдсэн Үндэсний Байгууллагын Даян Дэлхий гэрээнд оролцогч болсонтой холбогдуулан байгаль орчинд ээлтэй, нийгмийн хариуцлагатай ил тод үйл ажиллагаа эрхэлж байгаагаа баталж, Тогтвортой хөгжлийн чиглэлээр хийсэн ажлаа олон улсад анх удаа тайлагналаа.

Бид цаашид банкны үйл ажиллагааг Тогтвортой хөгжлийн 17 зорилгод нийцүүлэн явуулах, харилцагчдадаа цахим бүтээгдэхүүнийг санал болгон хүрээлэн буй орчинд ээлтэй байдлыг эрхэмлэх, Тогтвортой хөгжлийн тайлангаа тогтмол бэлтгэн тайлагнах зэргээр ногоон ирээдүйн төлөө түүчээлэн ажиллах болно.  

Та бүхэн Төрийн банкны 2023 оны Тогтвортой хөгжлийн тайлантай ЭНД дарж танилцана уу.