Л.Энх-Амгалан: Гуравхан хуулийн популизмын өртөг 4.2 их наяд төгрөг давсан

       Гэр бүл, хөдөлмөр, нийгмийн хамгааллын сайд Л.Энх-Амгалан цаашид салбартаа ямар бодлого барьж ажиллах талаараа өнгөрсөн баасан гарагт мэдээлэл өгсөн. Тэрээр цаашдаа төрөөс олгож байгаа халамжийн зардлыг багасгаж, жинхэнэ зорилтот бүлэгт нь шилжүүлж, иргэд болон ажил олгогчийн сар бүр төлж байгаа нийгмийн даатгалын шимтгэлийн хураамжийг үр өгөөжтэй болгоход анхаарч ажиллахаа илэрхийлсэн. Түүнчлэн өнөөдрийг хүртэл Тэтгэвэр болон Нийгмийн даатгалын сан өндөр алдагдалтай ажиллаж байгааг таслан зогсоож, цаашдаа хувийн тэтгэврийн сан байгуулах эрх зүйн орчин бий болгохоо илэрхийлсэн юм.

Түүнчлэн тэрээр өнгөрсөн амралтын өдрүүдэд нийгмийн сүлжээнд тэтгэврийн шинэчлэл хийх эсэх асуудлыг хэлэлцүүлж, сүүлийн нэг жилд гаргасан зарим хууль, шийдвэрээс болж Тэтгэврийн санд 4.2 их наяд төгрөгийн алдагдал үүссэн гэж мэдэгджээ.

Энэ талаар Гэр бүл, хөдөлмөр, нийгмийн хамгааллын сайд Л.Энх-Амгалан: Ажилласан жилийг нөхөн тооцсон, малчдын тэтгэврийн насыг урагшлуулсан, тэтгэвэр бодуулах жилийг 7 жил байсныг таван жил болгосон гэх мэт гуравхан хуулиас болж тэтгэврийн санд 4.2 их наяд төгрөгийн алдагдал үүсгэх эрсдэлийг бий болгосон байна шүү. Популизмын өртөг. Матрын нулимс биш шүү, оройтоогүй дээр засъя гэжээ.

Эргэн сануулахад, сайдын дурдсан дээрх хуулийн өөрчлөлтийг эрх баригч МАН хийсэн бөгөөд 2023 оны долдугаар сарын 7-нд батлагдсан Нийгмийн даатгалын багц хуулийн шинэчилсэн найруулгын хүрээнд хийгдсэн байдаг. Энэ үед Л.Энх-Амгалан сайд өөрөө засагт Боловсролын сайдаар ажиллаж байсан билээ.