Н.Номтойбаяр: Ц.Батсүх гэж хурандаа цолтой хулгайч нэг сая ам.доллар нэхсэн Ц.Батсүх: АТГ-т шалгуулна

           УИХ-ын гишүүн Н.Номтойбаяр өнгөрсөн долоо хоногт “Цагдаагийн эрх бүхий албан тушаалтан танаас нэг сая ам.доллар нэхсэн нь үнэн юм уу” гэх сэтгүүлчийн асуултад “Үнэн. Ц.Батсүх гэдэг хурандаа цолтой хулгайч бий. “Олон нийтэд битгий зарлаач” гээд тал тохой татаад л... Хөөрхий муу найз маань ч бурхан болчихлоо. Хуурай ах минь байсан юм” гэж хариулав. Энэ тухай эргэн сануулахад, УИХ-ын гишүүн Н.Номтойбаяр, хурандаа Ц.Батсүх нарын медиа тулаан 2019 оны дөрөвдүгээр сард ширүүсч байлаа. Тодруулбал, Н.Номтойбаяр “Цензургүй яриа” нэвтрүүлэгт оролцох үеэрээ өөрөөс нь нэг сая ам.доллар нэхсэн цагдаагийн хурандаагийн тухай ярьсан. Хэдийгээр нэр усыг нь хэлээгүй ч энэ ярианы эзнээр тухайн үед тэр хурандаа нь ЦЕГ-ын Тэргүүн дэд дарга асан, хурандаа Ц.Батсүх гэдгийг хэвлэлүүд мэдээлсэн. Хурандаа Ц.Батсүхийн хувьд, Н.Номтойбаярын дээрх ярианд “Мөнгө нэхсэн хүн” гэж намайг хэлж байгаа юм. Энэ бол гүтгэлэг. АТГ-т хүсэлт гаргаж өөрийгөө шалгуулна. “Хоёр хүнээр дамжуулан нэг сая ам.доллар нэхсэн” гээд “Нэг нь миний найз “Мунзуй” хочит Г.Нямдорж гэдэг хүнээр дамжуулан нэхсэн” гэж байна лээ. Ямар юмных нь мөнгө нэхэх вэ. Мөнгө нэхсэн гээд байгаа нь 2013 оных юм шиг байгаа юм. Тэр үед би УМБГ-ын дарга байлаа. Н.Номтойбаяр “Мунзуй”-тайгаа баранд зодоон цохион хийж, хутга шөвөгний хэрэгт холбогдчихоод байсан үе. Тэр хэргийг дүүргийн мөрдөнд шалгаж байсан. Н.Номтойбаяр сонин хэвлэлд “Өөрийгөө буруу зөрүү шалгалаа” гэж ярьдаг байсан. Сүүлдээ “Мунзуй”-ийн ард намайг байгаа гэж ярьдаг болсон. “Мунзуй” Г.Нямдорж болдоггүй этгээд, цагдаагийнхан андахгүй. Намайг 1993 онд Баянгол дүүрэгт анх мөрдөн байцаагч байхад орон байрны хулгайн хэргээр шалгагдаж байсан. “Центрпойнт-ын хэргээр над дээр бас шалгагдаж ял сонсож байсан. Сүүлд сураг сонсох нь ээ “МАК”-д ажилладаг, Н.Номтойбаярын багын найз юм гэсэн. Н.Номтойбаяр баранд танхайраад шалгагдахаараа “Шударга бусын хонгил”-оор орсон болдог юм уу. Хууль бусаар баавгай агнасныг нь шалгахаар бас “Хонгил”-оор оруулсан болох уу. Н.Номтойбаяр Монголын төр, цагдааг даапаалж байна”  хэмээн мэдэгдэж байлаа.

                                                                                                                                                       Г.Анар