Төрийн хар хүн хаана байна

       Орон нутгийн сонгуулийн сурталчилгааны ажил өндөрлөх дөхөж байна. Хуулийн хугацаандаа багтаж олон нэр дэвшигчид өөрсдийгөө олон түмэнд сурталчилж, таниулж яваа харагдана. Хотын сонгууль бол бидний хувьд маш чухал.

Энэ сонгуулиар хэн биднийг төлөөлөх вэ, наанадаж намайг цаанадаж таныг хэн төлөөлөх вэ гэдэг энгийн асуулт байгаа юм. Асуулт амархан. Тэд юу хийж чадах вэ. Тэр хүн төрд бэлтгэгдсэн хүн мөн үү? Төрийн хүнд тавигдах анхан шатны шаардлага хангаж чадаж байгаа юу. Яг одоо та нар хилийн цаанаас яаж харагдаж байгааг хэлье.

Нэр дэвшигчид ээ, Монгол Улс гэж нэг л эрх ашиг бий. Улсын нэрийн дараа, эцгийн чинь нэр явдаг юм. Энгийнээр хэлбэл, Монгол Улсын иргэн тэр овогтой тэр...

Өнөөдөр улс орны хувьд тулгамдсан маш олон асуудал бий. Эдгээр асуудлын хамгийн чухал амин сүнс бол Монгол хүн эрүүл байх. Эрүүл байхын тулд яах ёстой юм. Бүх ард иргэд нэг нарыг харж, нэг агаараар амьсгалж байна. Түүнээс Ардын нам агаарын бохирдлыг устгавал Ардчилсан намын гишүүд тэр агаараар амьсгалахгүй гэсэн үг огтхон ч биш. Тэсгим хүйтэн хаяанд ирсэн байхад энэ асуудлыг хөндөж тавьж байгаа нэр дэвшигчийг харсангүй. Харин хачин том уриа лоозон дэвшүүлж түүнийгээ бараг өөрөө ч тайлбарлаж чадахгүй нэр дэвшигчид олон байна. Зарим нэр дэвшигчид нь аргаа бараад бүжиглэж, дуулж, инээж, ханиаж гэр бүл үр хүүхдээ пиартаа татан оруулж яваа харагдана. Төрийн ажил хийх гэж байгаа бол таны гэр бүл үүнд ямар хамаатай юм. Тэднийгээ дургүй байхад нь түмний шившиг болгох ямар хэрэгтэй юм. Төрийн ажил төрлөөс хол явбал түмэнд өлзийтэй. Хамгийн эмгэнэлтэйнь  нэр дэвшигчдийн эцгийн нэр байхгүй юм шиг тэр улстөрчийн хүн, энэ улстөрчийн хүн гэнэ ээ. Ичих хэрэгтэй. Өөрийн үзэл бодол, үнэт зүйл, хийж чадах ажлын төлөвлөгөө гэж алга уу. Бас нэг зүйл нь нэр дэвшигчид мөнгөгүй гэнэ. Мөнгөгүй юм бол яах гэж төрд орох гэж байгаа юм. Хулгай хийх гэж байгаа юм уу. Хэзээ мөнгөтэй болох уу. Төрийн хяналт сулрахыг андаж байгаад хусах уу. Намын далбаан дор баяжигсдаас одоо салах цаг болсон. Саяхан нэг том телевизийн захирал чухам шүүх цагдаагаар явж хохирогчийн дүр эсгээд явсан. Одоо намын гүйцэтгэх албаны хамгийн том дарга болсон "би"-гээр өвчилсөн давхиж яваа харагдана. Намтайгаа эргэх холбоотой ажилладаг нь хожиж, намгүй хэрнээ боловсролтой, мэдлэгтэй, ёс зүйтэй нь хаяанд суудаг цаг иржээ. Өөр нэг зүйл нь дарга нь УИХ-ын гишүүн, туслах нь нийслэлд нэр дэвшиж ч байх шиг. Бүр нэг заавал төрөөс зулгааж амьдрах албатай мэт хүмүүс байна.

Ийм хүмүүсийг дээрээ залчихаар бид тэднээс юу хүлээх вэ. Тиймээс нэр дэвшигчдээс эхлээд төрийн хүн ямар байх ёстой вэ гэдэг асуултыг заавал асууж баримтжуулж үлдээмээр. Үргэлж дээрээс заавартай амьдарч ирсэн Монголчуудын хувьд өнөөдөр өөрсдийнхөө эрх ашиг, үр хүүхэд хойч үеийнхээ төлөө санаа тавих цаг ирсэн байна шүү. Ёстой үнэн гутлаа өмсөх зуурт худал уул даваад явчихлаа гэдэг шиг орон нутгийн сонгуулийн пиарын өнгө нэг иймэрхүү л харагдаж байна.