Ерөнхий сайд яг хаачсан бэ, Н.Учрал сайд аа

        Ерөнхий сайд Л.Оюун-Эрдэнэ алга болов. Чуулганы нэгдсэн хуралдаан дээр тэрбээр өнөөдөр (2024.10.25) боомтын сэргэлтийн талаар УИХ-ын гишүүдэд мэдээлэл өгч, асуултад нь хариулах ёстой байсан ч танхимд орж ирсэнгүй. Тэргүүн шадар сайд Лу.Гантөмөр оронд нь индэрт гарч, сунжирсан урт илтгэл тавив. ЗГХЭГ-ын дарга Н.Учрал “Ерөнхий сайд Л.Оюун-Эрдэнэ түр эзгүй байгаа” гэлээ. Энэ яг юу гэсэн үг вэ. Монгол Улсын Ерөнхий сайд бол жирийн иргэн биш. Монгол төрийн 03 өндөр албан тушаалтан. Төрийн А зэрэглэлийн хамгаалалтад байдаг хүн. Гэтэл хаачив. УИХ-ын дарга Д.Амарбаясгалангийн хэлснээр, Монгол Улсын Засгийн газраас сар бүрийн дөрөв дэх долоо хоногийн баасан гарагт чуулганы нэгдсэн хуралдаан дээр тодорхой сэдвээр мэдээлэл өгдөг. Хүний, өөрийн намынхан Ерөнхий сайдаас асуулт асууж хариулт авдаг дэгтэй. Харин Ерөнхий сайд Л.Оюун-Эрдэнэ УИХ-ын Тамгын газарт хугацааг нь тулгаж “Түр эзгүй байгаа” гэсэн албан бичиг ирүүлж, өөрийнхөө өмнөөс Лу.Гантөмөрөөр боомтын сэргэлтийн талаар илтгэл тавиулсан болж, ЗГХЭГ-ын дарга Н.Учралаар “Түр эзгүй байгаа” гэсэн үг хэлүүлэх ямар шалтгаан үүсэв. Ерөнхий сайд Л.Оюун-Эрдэнэ өөрөө яг хаачсан бэ. Монгол Улсын Ерөнхий сайд гэдэг ажил, амьдрал нь протокол… Монгол төрийн 03 хүний хувьд халдашгүй бүрэн эрхтэйн адил өдөр тутмын үйл ажиллагаа нь олон нийтэд ил тод байх учиртай албан тушаалтан. Гэтэл УИХ-ын чуулганы нэгдсэн хуралдааныг үл хүндэтгэж, УИХ-ын даргыг хууль сануулахаас өөр аргагүйд хүргэж, АН-ын зарим гишүүнийг уурлуулж чуулганыг орхин гартал “Түр эзгүй” гэсэн шалтгаан нь яг юу байв. Арай эрх мэдэлдээ аархан УИХ-ын үйл ажиллагааг үл ойшоож, гадаад, дотоодоор төсвийн мөнгөөр зугаалж явдаг сайд нар шигээ аяглаж байгаа юм биш биз. Эрх сайд Ч.Номингийнхоо “Тэрэлж” зочид буудалд баасан гарагийн “party” хийх гээд хотоос гарсан уу, “АН дахь МАН-ын БЭТ” хэмээн намынхандаа адлуулж яваа яамгүй сайд Э.Одбаяр мэт шигээ утаа, түгжрэлээс зугтаад Фукуок руу нисчихээгүй байгаа! Ахынхаа найруулсан “Тамгагүй төр”-ийг үзэхээр Сингапурт тухлав уу. Яг хаачив...

Ерөнхий сайд Л.Оюун-Эрдэнэ 2019 онд ЗГХЭГ-ын дарга байхдаа бас ингэж гэнэт алга болж байв. Хэвлэлийнхэн тэр үед сураг ажиг тавьж, Төрийн ордонд өөрөөс нь асуухад “Улсын дөрвөн өдрийн ажлыг алдагдуулчихлаа. Хоолны хордлого хөл рүү ороод БНСУ-д эмчлүүлэхээр явсан” гэсэн тайлбарыг өгч байлаа. Сайд нар нь УИХ-ын үйл ажиллагааг үл хүндэтгэдгээрээ “алдаршиж”, төсвийн мөнгийг баруун, солгойгүй үрж, АН-ынхан намын дарга Лу.Гантөмөрийг огцруулахаар гарын үсэг цуглуулж, танхим руу нь чиглэсэн улс төр ирэх өвөл улайсч мэдэхээр байхад Ерөнхий сайд Л.Оюун-Эрдэнэ алга болчихдог нь хачирхалтай. Тэр тусмаа Засгийн газрын 100 хоног өнөө, маргаашгүй тохиох гэж байгаа энэ үед ПР хийх олигтой хийсэн ажилгүй юм гэхэд ядаж боомтын сэргэлтийн талаар ярьчих зориг зүрх дутав уу Ерөнхий сайдад. Юм л бол С.Зоригийг хөнөөсөн хэрэг, “Маш том бүлэглэл”-ийн тухай ярьсаар цэнэг нь дуусав уу... УИХ улсын төсөв хэлэлцэж, улс орны эдийн засаг ирэх онд ямар байхыг зураглаж буй энэ чухал үед Ерөнхий сайд Л.Оюун-Эрдэнэ гэнэт алга боллоо. Яг хаачсан юм бол, Н.Учрал сайд аа. ЗГХЭГ-ын дарга гэх хамаг том даргын хувьд та л мэдэх учиртай. Монгол Улсын Ерөнхий сайд хүн доод албан тушаалтнуудаа өмнөөсөө гарган элдэв тайлбар хэлүүлж, УИХ-ын чуулганд мэдээлэл хийх ажлаа тасалж, гэнэт алга болж болохгүй. “Түр эзгүй байгаа” гэдэг бүр ч утгагүй тайлбар. УИХ бол Монгол Улсын хууль тогтоох дээд байгууллага.

                                                                                                                                                       Г.Анар