“Хөгжлийн бэрхшээл ба тэгш хүртээмж-2024” эрдэм шинжилгээний хурал зохион байгуулагдлаа

       НҮБ-ын Ерөнхий Ассамблейгаас жил бүрийн 12 дугаар сарын 03-ны өдрийг Хөгжлийн бэрхшээлтэй хүний эрхийн өдөр болгон зарласан бөгөөд уг өдрийг тохиолдуулан “Хөгжлийн бэрхшээл ба тэгш хүртээмж-2024” эрдэм шинжилгээний хурлыг 12 дах жилдээ уламжлал болгон амжилттай зохион байгууллаа.

Эрдэм шинжилгээний хурлын зорилго нь хөгжлийн бэрхшээлийн салбарыг судалгаа, нотолгоонд тулгуурлан хөгжүүлэх, судалгаа шинжилгээний ажлыг өргөжүүлэх, салбар хоорондын уялдаа холбоог бэхжүүлэх ач холбогдолтой юм.

Тус хурал нь 6 дэд сэдвийн хүрээнд төр, төрийн бус байгууллага, их дээд сургуулийн оюутан ажилтан, судлаач, эрдэмтэн, мэргэжилтнүүд салбар бүрээс нийт 86 илтгэл ирүүлснээс шилдэг 8 илтгэлийг хэлэлцүүллээ. Шүүгчдийн бүрэлдэхүүн саналыг нэгтэн дараах 4 байрыг шалгаруулж энэ жилийн судалгааны өгүүллүүд шинэ санаа, практик ач холбогдол их байгааг онцоллоо.

I байранд: “Тархины саатай хүүхдэд Spider cage буюу аалзны тор аргыг нэвтрүүлж эмчилгээнд ашигласан үр дүн” сэдэвт илтгэлээр ХБХСЗХТ-ийн Хөдөлгөөн засалч Н.Цэсэнжав, Б.Оюунсүрэн нар;

II байранд: “Тархины гэмтлийн дараах байдалд цогц сэргээн засах эмчилгээг урт хугацаанд хийсэн үр дүнг танилцуулах нь” сэдэвт илтгэлээр ХБХСЗХТ-ийн Тасгийн эрхлэгч, Тэргүүлэх зэргийн эмч Клиникийн профессор Б.Хандсүрэн, Сэргээн засахын эмч Н.Золзаяа нар;

III байранд: “Хөгжлийн бэрхшээлтэй хүүхдийг тодорхойлох үүрэг бүхий салбар комиссын үйл ажиллагааг сайжруулахад технологийн шийдлийг ашиглах нь” сэдэвт илтгэлээр IRIM Хараат Бус Судалгааны Хүрээлэнгийн үйл ажиллагаа хариуцсан захирал Г.Жаргалмаа, Төсөл, хөгжлийн судлаач Б.Батхүү нар;

Тусгай байранд: “Хөгжлийн бэрхшээлтэй хүүхэдтэй ажиллаж буй багшийн арга зүй, ур чадвар, хандлага чухал болох нь” сэдэвт илтгэлээр Сүхбаатар аймаг, Баруун-Урт сумын Ерөнхий боловсролын 1-р сургуулийн багш Н.Ариунболор нар тус тус шалгарлаа.Энэ жилийн хувьд “Боловсрол”, “Нийгмийн хамгаалал”, “Эрүүл мэнд”-ийн чиглэлээрх судалгааны өгүүллүүд зонхилох хувийг эзэлж байгаа ба орон нутаг дах эрдэмтэн судлаач, оюутан залуучууд, салбарын мэргэжилтнүүдийн идэвх, оролцоо нэмэгдсэнээрээ онцлог хурал боллоо.