БНСУ-д долоо хоногийн турш гашуудал зарлалаа

      Өмнөд Солонгосын Чэжү Эйр компанийн Боинг 737-800 загварын зорчигч тээврийн онгоц өчигдөр өглөө улсын өмнөд эргийн Муаны олон улсын нисэх буудал дээр осолдож, харамсалтай үйл явдал боллоо. Тус компанийн 2216 дугаар нислэгийг үйлдсэн онгоцон дотор нислэгийн багийн зургаан гишүүн, 175 зорчигчийн хамт 181 хүн байсан. Онгоц нисэх буудалд газардахдаа дугуйгаа гаргаж чадалгүй элгээрээ гулсаж, нисэх буудлын хамгаалалтын хана хашаа мөргөж улмаар дэлбэрч осолдсон.

Осол гарсны дараа хоёр хүнийг аварсан ч үлдсэн 179 хүн амь насаа алдсан нь тодорхой боллоо. Ослын үеэр аврагдсан хоёр хүн 25, 33 настай онгоцны үйлчлэгчид байна.

Зорчигчдын 173 нь Өмнөд Солонгосын иргэд байсан бол Тайландын хоёр иргэн байжээ. Хамгийн бага нь гурван настай хүүхэд, хамгийн ахмад нь 78 настай байсан. Бусад зорчигчид ихэнх нь 40, 50, 60 насны хүмүүс байжээ.

Өмнөд Солонгос улс даяар өчигдрөөс эхлэн долоо хоногийн хугацаатай гашуудал зарлалаа. Уг осол гарахаас өмнөхөн Өмнөд Солонгос улсад улс төрд огцом эргэлт гарч Ерөнхийлөгч байсан Юн Сок Ёл болон түүний оронд Ерөнхийлөгчийн үүргийг 14 хоног гүйцэтгэсэн Ерөнхий сайд асан Хан Дак Сү нар шалгагдаж, бүрэн эрхийг нь түдгэлзүүлээд байгаа. Ердөө өнгөрсөн баасан гарагт Ерөнхийлөгч, Ерөнхий сайдын үүрэг гүйцэтгэгчээр томилогдсон Эдийн засаг, сангийн сайд Чой Сан Мок өчигдөр ослын газарт очсон байна. Тэрээр хохирогчдын ар гэрийнхэнд гүн эмгэнэл илэрхийлжээ.

Муаны нисэх буудал дээр онгоцны ослоор гэр бүлийнхээ хүмүүсийг алдсан иргэд цугласан. Тэд хохирогчдыг таниулах, шалгах ажлын явцыг сэтгэл өвдөн хүлээж байна. Одоогоор 70 орчим хүний цогцсыг таниулж, нэрийг нь тогтоожээ.

Ослын шалтгааныг тогтооход зайлшгүй хугацаа шаардлагатай байна гэдгийг Өмнөд Солонгосын нисэх хүчин, агаарын тээврийн салбарын мэргэжилтнүүд хэлж байна. Осол гарахад нөлөөлсөн байж болзошгүй нилээд хэдэн шалтгаан байна гэж үзсэн. Нэг зорчигч гэр бүлийнхээ хүн рүү онгоц сүйрэхээс өмнө нэг далавч шувуун сүрэгтэй мөргөлдсөн тухай зурвас бичсэн байна. Ерөнхийдөө шувуун сүрэгтэй мөргөлдсөн, цаг агаарын байдал муу байсан зэргээс үүдэлтэйгээр онгоц осолдсон байж болзошгүй гэж үзэж буй. Гэхдээ шувуун сүрэгтэй үнэхээр мөргөлдсөн үү, мөргөлдсөн бол энэ нь ослын жинхэнэ шалтгаан байсан уу гэдэг нь тодорхой бус байгаа юм.

Ослын жинхэнэ шалтгааныг тогтооход зайлшгүй хэрэгтэй хоёр хар хайрцгийг олсон бөгөөд нэг нь бүхээгийн дууг бичдэг бол нөгөө нь нислэгийн мэдээллийг бичиж авсан байгаа аж. Хар хайрцгуудыг уншсаны дараа ослын шалтгаан тодорхой болно.

Нөгөөтэйгүүр онгоцны нисгэгчийн чадвар, туршлага бага байсан нь осол гарах гол шалтгаан байсан гэх мэдээлэл гараад буй. Онгоцны нисгэгч өмнө нь 6,800 цаг нислэг үйлдсэн, туршлагын хувьд тийм ч нимгэн байгаагүй. Уг нислэг Тайландын нийслэл Бангкок хотоос хөөрөөд таван цаг орчмын дараа Муанд газардахдаа сүйрсэн юм.

Чэжү Эйр нислэгийн компани нь 2005 онд үүсгэн байгуулагдсан. Зорчигч тээврийн хямд үнэтэй нислэгийн компаниудын тоонд ордог.