Рио Тинто татварын маргаанд 295 сая доллар төлөх саналаа Монголын Засгийн газарт хүргүүлжээ

      2023 оны гуравдугаар сарын 13-ны хуучин зураг ашиглав.

Рио Тинто групп Оюу толгойн зэсийн уурхайн асуудлаар удаан үргэлжилсэн татварын маргааныг шийдвэрлэхийн тулд Монголын Засгийн газарт 295 сая ам.доллар санал хүргүүлсэн талаар “Financial Review” мэдээлжээ.

Тодруулбал, Рио Тинтогийн Зэсийн олборлолтын захирал Кэти Жексон өнгөрсөн арванхоёрдугаар сард Монгол Улсын Аж үйлдвэр, эрдэс баялгийн сайд Ц.Туваанд захидал бичиж, 2013-2020 оны хоорондох татварын нэхэмжлэлийг шийдвэрлэхийг санал болгосон талаар “The Australian Financial Review” сэтгүүлд мэдээлсэн байна.

Монголын татварын албанаас 2018 онд Оюу толгой ХХК-ийн 2013-2015 оны үйл ажиллагаанд шалгалт хийж, татварын акт тавьсан байдаг. Оюу толгойн хувьцаа эзэшигч Рио Тинто групп энэхүү татварын актаас 4.8 сая ам.долларыг хүлээн зөвшөөрч төлсөн бөгөөд үлдсэнийг нь хүлээн зөвшөөрөх боломжгүй гэдгээ мэдэгдэж байсан. Талууд татварын маргааны асуудлаар удаа дараа уулзалдаж, ойлголцолд хүрэхээр ярилцсан боловч нэгдсэн шийдэлд хүрч чадаагүй юм.

Харин оны өмнө Рио Тинто Монголын татварын албанаас тавьсан татварын актын хүү, торгуулийг оролцуулан 295 сая ам.доллар санал болгосон байна. 

Хатагтай Жексон захидалдаа “Монгол Улсын Засгийн газар үүсээд буй татварын маргааныг харилцан ойлголцлын замаар шийдвэрлэх, цаашид татварын аливаа маргаан гарахаас зайлсхийхийн тулд тодорхой, иж бүрэн тохиролцоонд хүрэх саналтай байгаагаа илэрхийлж байна” гэжээ.

Монголын Засгийн газар уг захидалтай холбоотойгоор  албан ёсоор хариу өгөөгүй байна.

Рио Тинто группийн хэвлэлийн төлөөлөгч лхагва гарагт “Бид Монгол Улсын Засгийн газартай татварын асуудлаар харилцан ойлголцолд хүрэхийн тулд идэвхтэй ажиллаж байна. Урт хугацааны түншүүдийн хувьд бид бүх оролцогч талуудад ашигтай үр дүнд хүрэхэд анхаарлаа хандуулж байгаа. Хэлэлцүүлэг үргэлжилж байгаа бөгөөд одоогоор дэлгэрэнгүй мэдээлэл өгөх боломжгүй байна” гэжээ.

Рио Тинто групп Оюу толгойг дэлхийн хамгийн том зэсийн уурхайн нэг болгохын төлөө ажиллаж байгаа бөгөөд далд уурхайн үйл ажиллагааг эрчимжсээр байна. Оюу толгой ордоос олборлох зэсийн 2023 онд 620 мянган тонн байсан бол 2025 онд 850 мянган тонн хүртэл нэмэгдүүлэхээр зорьж байгаа аж. Оюу толгой зэсийн олборлолтоо ирэх онд 18 хувиар, 2030 он гэхэд 40 хувиар нэмэгдэхүүлэх төлөвтэй байна. Энэхүү өөрчлөлт нь Риогийн төмрийн хүдрийн ашгаас хамааралтай байдлыг  77 хувиас 55 хувь хүртэл бууруулна гэж тооцоолжээ.