Эрүүл мэндийн яам гадаадад ажиллаж, суралцаж буй эмч нартай хамтарч ажиллана

         Бүгд Найрамдах Турк Улсад ажиллаж амьдардаг 30 гаруй Монгол эмч нар байдаг бөгөөд тэдний төлөөлөлтэй Эрүүл мэндийн сайд Т.Мөнхсайхан БНТУ-д ажиллах үеэрээ уулзаж салбарынхаа тухай нээлттэй яриа өрнүүллээ. Энэ үеэр Эрүүл мэндийн сайд Монгол Улсад эмчлэгддэггүй өвчлөлийг бууруулах бодлогын хүрээнд хийж хэрэгжүүлж буй ажлаа танилцуулахаас гадна гадаадад суралцаж, ажиллаж буй эмч нараа эх орондоо ажиллах орчин нөхцлийг бүрдүүлэхээр ажиллаж буйгаа онцлон дурдав.

Харин эмч нарын тухайд Монгол Улсад эмчлэгддэгүй өвчлөлөөр БНТУ-ыг зорин ирж буй эмчлүүлэгчид эмчилгээ хийлгэх эмнэлгээ сайтар судлаагүйн улмаас санхүүгийн болон эмчилгээний хохирол амсах эрсдэлтэй байдаг тухай, Эрүүл мэндийн сайдын салбартаа хийж буй бодлого, үйл ажиллагааг дэмжиж буйгаа хэллээ. Эдгээр эмч нараас эх орондоо ирж ажиллах төлөвлөгөөтэй нилээдгүй хүмүүс байгаа бөгөөд тодорхой хугацааны туршлагыг хуримтлуулаад эх орондоо ирж ажиллахыг хүсч буйгаа илэрхийлсэн юм.

Эрүүл мэндийн сайдын тухайд гадаадад ажиллаж амьдарч буй эмч мэргэжилтнүүдээ эх орондоо ажиллаж амьдрах боломж нөхцлийг бүрдүүлэхэд анхааран ажиллаж байна.

Уулзалтын төгсгөлд БНТУ-ын хувийн болон улсын эмнэлэгт ажиллахаас гадна БНТУ-д ажиллаж амьдардаг эх орон элэг нэгтнүүддээ эрүүл мэндийн тусламж үйлчилгээ үзүүлдэг эмч нарын төлөөллийг төрийн одон медаль болон салбарын шагналаар шагнаж урамшууллаа.