Вашингтоны ойролцоо мөргөлдсөн онгоц, нисдэг тэрэгний осолд 67 хүн амь үрэгдлээ

      Вашингтоны ойролцоо агаарт мөргөлдөж Потомак голд унасан нисдэг тэрэг болон зорчигч тээврийн онгоцоос амьд хүн үлдэх найдвар тасарлаа.

Орон нутгийн цагаар лхагва гаргийн орой 21 цагийн үед АНУ-ын нийслэл Вашингтоны ойролцоо зорчигч тээврийн онгоц армийн цэргийн зориулалттай нисдэг тэрэгтэй агаарт мөргөлдөж, Потомак голд унасан осол гарсан. Агаарт осолдсон Американ Эйрлайнс компанийн Канзас мужийн Вичита хотоос хөөрсөн зорчигч тээврийн онгоцод 64 хүн байсан бол цэргийн нисдэг тэргэнд гурван цэрэг байжээ.

Осол гарсны дараа аврагчид эрэн хайх, аврах ажлыг эхлүүлсэн боловч одоогоор нэг ч хүнийг гаргаж авч чадаагүй байна. Нисдэг тэрэг болон зорчигч тээврийн онгоцууд голд унаад нилээд хугацаа өнгөрсөн тул ослоос амьд хүн үлдсэн гэх найдвар тасарлаа. Өөрөөр хэлбэл осолдож голд унасан агаарын тээврийн хэрэгслүүдэд байсан нийт 67 хүн амь үрэгдсэн гэж үзэж байна.

Лхагва гаргийн орой болсон осол АНУ-ын нутаг дэвсгэрт 2009 оноос хойш гараагүй агаарын тээврийн томоохон осолд тооцогдож байна. Американ Ийглийн 5342 дугаар нислэгийг үйлдэж байсан онгоц Рональд Рейган нисэх буудалд газардах гэж байгаад АНУ-ын армийн Хар харцага нисдэг тэрэгтэй мөргөлдсөн. Потомак голын ус тэсгим хүйтэн байгаагаас гадна аврагчид аврах ажиллагааг явуулахад өндөр эрсдэлтэй байгааг Үндэсний тээврийн аюулгүй байдлыг хамгаалах газраас мэдэгджээ. Пүрэв гаргийн оройны байдлаар Виржиниа, Вашингтон мужуудыг заагладаг Потомак голоос 28 хүний цогцсыг олсон байна. Зарим хэвлэлүүд 40 гаруй хүний цогцсыг олсон тухай мэдээлжээ. Ослын шалтгааныг одоогоор тогтоогоогүй байна. Онгоцнуудын мэдээллийг бичдэг хоёр хар хайрцагны нэгийг олж Холбооны агаарын тээврийн газар ослын шалтгааныг тогтоох ажлыг гүйцэтгэж байна.

Дүрэм ёсоор ослоос хойш 30 хоногийн дотор урьдчилсан байдлаар ослын шалтгааны талаар мэдээлэх ёстой. Одоо мэдэгдэж байгаагаар Рейганы олон улсын нисэх буудлын хяналтын цамхаг агаарын тээврийн зохицуулалтыг бүрэн хангаж чадаагүйгээс болж осол гарсан байх магадлалтай байна. Рейганы нисэх буудлын ойролцоо агаарын зам, тээвэр хэт их ачаалалтай байдаг. Тиймээс оройн ээлжинд хяналтын цамхагт хоёр ажилтан байх ёстой. Гэвч агаарын тээврийн зохицуулалтыг хийдэг хяналтын цамхаг, удирдлагын хэсэгт ид ачааллын үед нэг хүн ажиллаж байсан гэдгийг тогтоожээ.

АНУ даяар хувийн, бизнесийн, Засгийн газрын гэх мэт төрөл бүрийн зориулалттай 20,000 орчим нисэх буудал байдаг. Вашингтонд гурван том нисэх буудал байдгийн нэг нь Рейганы нисэх буудал юм. АНУ-д үйл ажиллагаа явуулдаг томоохон нисэх буудлуудын хяналтын цамхагт ажиллах хүчний нөөц дутмаг байдаг талаар Нью-Йорк Таймс сонинд бичсэн байна. Нислэгийн хяналтын төв ганц ажилтан онгоцнуудын нисэх буудалд газардах болон нисэх буудлаас хөөрөх хөдөлгөөн, мөн нисдэг тэрэгний хөдөлгөөнийг бүгдийг зохицуулж ажиллаж байжээ. Өөрөөр хэлбэл хоёр хүний ажлыг нэг хүн дангаараа гүйцэтгэж байснаас алдаа гарсан гэж таамаглаж байна.