Монголын талд цасан дээр хэвтэж буй мануулын зураг шилдгээр шалгарчээ

      ЛОНДОН, 2025 оны нэгдүгээр сарын 30 /CNN/. 2024 оны шилдэг аяллын гэрэл зурагчин шалгаруулах уралдааны шилдгүүдийн тоонд алсын барааг ширтэж буй охин, ажлын завсарлагааныхаа үеэр хөгжилдөн ярилцаж буй хоёр хятад уурхайчин, Монголын талд цасан дээр хэвтэж буй мануулын зургууд багтжээ.

Шилдэг гэрэл зургуудыг нэгтгэн дүгнээд “дэлхий даяар гайхалтай аялал хийж, үзэсгэлэнтэй өнгө төрхийг буулгасан гэрэл зургуудыг авч чаджээ” гэж тэмцээнийг зохион байгуулагчид мэдэгдсэн байна.

Уралдааны гол шагналыг хүртсэн Америкийн гэрэл зурагчин Пайпер Маккей хэлэхдээ, энэхүү шагнал нь миний амьдралын зорилго, Африк даяар 20 гаруй жилийн турш хийсэн ажлын маань үр дүн болж байна гэлээ.

Шүүгчид 150 гаруй орны гэрэл зурагчдын ирүүлсэн 20 мянга гаруй бүтээлээс шилдгүүдийг тодруулжээ. Мөн тодорхой ангиллуудад ялагчдыг шагнаж урамшуулсан байна.

Мексикийн гэрэл зурагчин Марикруз Сайнц де Ажа Папуа Шинэ Гвинейн Вауга овгийн амьдралыг харуулсан зургуудаараа “Нүүр царай, хүмүүс, соёл” төрөлд түрүүлжээ.

Харин Их Британийн Женни Сток Куба дахь матруудын хүйтэн, хэрцгий төрхийг харуулсан гэрэл зургуудаараа “Зэрлэг ан амьтан, байгаль ба усан доорх ертөнц” төрөлд тэргүүн байр эзэлсэн байна.

Хятадын зурагчин Рэймонд Жаны хувьд Хятадын нүүрсний уурхайн ажилчид болон галт тэрэгний сэтгэл хөдөлгөм гэрэл зургуудаараа “Оны шилдэг залуу аяллын гэрэл зурагчин” шагналыг хүртсэн бол 12 настай Леонардо Мюррей Намибын цөл дэх манхныг харуулснаараа 14 хүртэлх насны ангилалд тэргүүлжээ.

Шалгарсан бүх гэрэл зургийг тэмцээний цахим хуудас болон Их Британийн Оксфорд хотын ойролцоох Банбьюри музей, галерейд гуравдугаар сарын 29-нөөс долоодугаар сарын 7-ны хооронд зохион байгуулах үзэсгэлэнгээс үзэх боломжтой. Уг үзэсгэлэнг дараа нь Арабын Нэгдсэн Эмират улс, Хятадын Чанша хотод дэлгэн үзүүлэх ажээ.