Маршал Х.Чойбалсангийн гэр бүлийнхэнд хүндэтгэл үзүүллээ

       Монгол Ардын Намын Ерөнхий Нарийн Бичгийн дарга Я.Содбаатар БНМАУ-ын Ерөнхий сайд, хошой баатар, маршал Хорлоогийн Чойбалсангийн гэр бүлийнхний төлөөллийг өнөөдөр /2025.02.06/ хүлээн авч уулзан, хүндэтгэл үзүүлсэн юм.

Ерөнхий Нарийн Бичгийн дарга Я.Содбаатар Монгол Улсын тусгаар тогтнолд онцгой гавьяа байгуулсан, ардын хувьсгалын "анхны долоо"-гийн нэг, маршал Х.Чойбалсангийн мэндэлсний 130 жилийн ой энэ онд тохиож буйтай холбогдуулан түүхт ойн хүрээнд хийж, хэрэгжүүлж байгаа ажлуудын талаар гэр бүлийнхэнд нь танилцууллаа. Мөн тэрбээр "Монгол Улсыг туурга, тусгаар бие даасан улс болгохын төлөө тэмцэж, ХХ зууны их бүтээн байгуулалтын үндэс суурийг тавьсан энэ эрхэм хүний үр сад та бүхнээс тусгаар тогтнолын үнэ цэнийг хойч үед сурталчлан таниулах, “Анхны долоо” сангийн үйл ажиллагааг өргөжүүлэхэд идэвхтэй хамтран ажиллахыг хүсэж байна" гэв.

Маршал Х.Чойбалсангийн зээ охин Ч.Хулан, түүний эгч Ч.Халиуны охин Д.Бишрэл нар уулзалтад оролцсон бөгөөд түүхт ойн хүрээнд өвөөгийнх нь өв, намтар бүхий ном бүтээсэнд талархаж буйгаа илэрхийлж, Монгол Ардын Намтай хэзээд хамтарч ажиллахад бэлэн гэдгээ хэлсэн юм. Зээ охин Ч.Хулан эх орныхоо тусгаар тогтнолын төлөө амь, биеэ үл хайрлан тэмцэж ирсэн эрэлхэг эх оронч, удирдагчдын үйл хэргийг хойч үед таниулах, иргэдийн улс төрийн боловсролыг дээшлүүлэхэд чиглэсэн арга хэмжээг зохион байгуулахаар “Анхны долоо” санг байгуулсан нь зөв зүйтэй ажил хэмээн онцолж байв.

Маршал Х.Чойбалсангийн гэр бүлийнхний төлөөлөл өнөөдөр /2025.02.06/ нээлтээ хийсэн “Маршал Х.Чойбалсангийн өв: Нууцад хадгалагдсан гэрэл зураг” номын нээлтэд хүндтэй зочдоор уригдан оролцсон юм.

БНМАУ-ын Ерөнхий сайд, хошой баатар, маршал Х.Чойбалсангийн гэр бүлийнхний төлөөлөлд хүндэтгэл үзүүлсэн энэхүү уулзалтад Монгол Ардын Намын Олон нийттэй харилцах, зохион байгуулалтын газрын дарга Ж.Дамдинцэрэн, Сан хөрөнгийн газрын дарга Ж.Чинболд,  Хүний нөөцийн хөгжлийн хэлтсийн дарга Л.Дэжидмаа нар оролцов.