Л.Оюун-Эрдэнэ ээ, Ерөнхий сайдын суудал хүний аминаас үнэтэй юү

         “Ээжтэйгээ хамгийн сүүлд утсаар ярихад “Миний хүү, одоо эхнэр авах болчихлоо доо” гэсэн. Дүүдээ би “Ах нь цэргээс халагдаж ирээд үсэглэлийн баярыг нь хийж өгнө өө” гэж амласан. Гэвч одоо би хайрт ээжээ, хөөрхөн дүү нараа алдчихлаа” гэх 18 настай хүүгийн өр өвтгөм яриа олон нийтийн сүлжээнд хөвөрч байна. Түүнийг сэтгүүлчдэд ярилцлага өгүүлэхгүй гэж татаж чангаах үл таних эрийн зүс царай ч хэвлэлийнхний дуран авайд өртжээ. Гэсэн ч ээж, дүү нараа цаг бусаар алдаж энэлэн шаналж яваа хүү сэтгүүлчдэд ярилцлага өгсөн байна. Сэтгүүлчид ч хүүгийн үг хэлэх эрхийг хамгаалж, олон нийтэд мэдээллийг хүргэж чадлаа. Чухам хэн гэдэг эрх мэдэлтэн тэр үл таних эрийг хүү рүү илгээж, хэвлэлийнхэнтэй сөргөөцөлдүүлсэн нь хачирхалтай. Бас хаанахын ямар эрхтэн дархтан нэг айлын зургаан хүн угаартаж амь насаа алдсаныг олон нийтэд мэдүүлэхийг хүсэхгүй байгаа нь сонин байна. Баянгол дүүргийн 22 дугаар хороонд оршин суудаг байсан нэгэн айлын гал голомт ийнхүү бөхлөө. Хүүгийн ээж одоо үгүй, хөөрхөн дүү нар нь ч бас байхгүй... “Ээж минь үр хүүхдүүдээ хүний дайтай хүн болгож өсгөсөн” гэж нулимс дуслуулан ярих хүү хорвоо дээр цор ганцаараа үлджээ. Цэргийн албанаас чөлөө авсан хүү гэрийнхээ босгыг алхахдаа л энэ харуусалт мэдээг анх сонссоноо ярьсан байна. Зургаан халуун амийг авч одсон энэ явдлын хариуцлагыг одоо хэн хүлээх ёстой вэ...! УИХ-аас зохион байгуулсан Утааны сонсголын үеэр “Шаардлага хангахгүй шахмал түлшнээс болж 779 хүн амиа алдсан” гэх мэдээлэл ил болсон. Тийм ээ, ил болсон... Ил болсон 779-өөс гадна хэчнээн хүн угаартаж нас барсан бол... Мэдэгдээгүй хэчнээн хүний амь цаана нь үлдэж хоцорсон бэ... Энэ асуултыг Монгол Улсын Ерөнхий сайд Л.Оюун-Эрдэнээс асууя. Монгол Улсын Ерөнхий сайд бол Хүүхдийн төлөө үндэсний зөвлөлийн дарга. Тиймээс ээж, дүү нар нь угаартаж амиа алдсан хүүгийн өмнөөс Ерөнхий сайд Л.Оюун-Эрдэнээс хариуцлага нэхье. Хүний аминаас үнэтэй эрх мэдэл гэж үгүй. Хүний аминаас дээгүүр Ерөнхий сайдын суудал гэж бас байх ёсгүй.

            Ерөнхий сайд Л.Оюун-Эрдэнэ УИХ-ын чуулганы үеэр “Шүүхийн ерөнхий зөвлөлийнхөн намайг хэд хэдэн удаа огцруулсан. Тэдний хүслээр болсон бол би хэд хэдэн удаа огцорчих байлаа” гэж мэдэгдсэн. ШЕЗ Ерөнхий сайд Л.Оюун-Эрдэнийг Үндсэн хуулийн Цэцэд өгсөн тухай мэдээлэл хэвлэлүүдэд нэг бус удаа гараад дарагдсан. Үндсэн хуулийн Цэц Ерөнхий сайд Л.Оюун-Эрдэнэтэй холбоотой асуудлыг хэрхэн шийдвэрлэсэн нь одоо болтол тодорхойгүй. Цэцийн шинэ даргыг томилсон, тэгээд таг чиг... Л.Оюун-Эрдэнэ ба шүүх засаглал хооронд медиа дажин одоо болтол өрнөсөн хэвээр. Гүйцэтгэх засаглал, шүүх засаглал хоёр ийнхүү эрх мэдлийн тулаан өрнүүлсэн нь дуусдаг ч үгүй, эцэс төгсгөл нь хэзээ ч юм. Харин одоо Ерөнхий сайд аа, олон нийтийн уур амьсгалыг мэдэр. Төрийн ордноос ахынхаа оффисолдог “Гэрэгэ тауэр”-ийн 15 давхар руу элдэв кино зохиол захиалахаас илүү ард иргэдийн бухимдлыг сонс. Сошиал хөлснийхөн буюу “Хиамчид”-ын ард нуугдаж, сэтгүүлчдээс бүү зугт. Утаа, түгжрэл, ажилгүйдэл, ядуурал, ток цахилгааны үнийн өсөлт, инфляцид дарлуулсан иргэд “Л.Оюун-Эрдэнэ бол Монгол Улсын хамгийн муу Ерөнхий сайд” гэж дүгнэж байна. Ардчилал, авлига, хэвлэлийн эрх чөлөөний индексээр огцом ухарсан энэ орны иргэд Л.Оюун-Эрдэнэ гэдэг хүнийг “Ерөнхий сайдын албан тушаал хаших чадваргүй” гэдэг байр суурьтай байна. Товчхондоо, Л.Оюун-Эрдэнэ гэдэг амаргүй Ерөнхий сайдыг ард түмэн аль хэдийнэ огцруулчихсан, өөрөө л эрх мэдэлтэйгээ зууралдаад “Ажлаа хий” гэдэг захиалгат жагсаалын цаана оршоод байгаа болохоос... Л.Оюун-Эрдэнэ огцрох болзлоо 100 хувь хангасан. Харин энэ удаад тэр өргөдлөө өгөөд танхимаараа огцрох эцсийн зогсоол дээрээ ирлээ. Л.Оюун-Эрдэнэ гэдэг Монгол Улсын хамгийн муу Ерөнхий сайдын эрин үеийг эцэс болгох цаг боллоо. Угаартаж амиа алдсан 779 хүн, ээж, дүү нар нь угаартсан байдалтай нас барсан хүүгийн өмнө хариуцлага хүлээх улс төрийн шийдвэр гаргах л Л.Оюун-Эрдэнэд үлдлээ. Энэ улсын иргэд Л.Оюун-Эрдэнийг эрх мэдэлтэй байлгахын тулд амь насаараа өргөл өргөх ёсгүй. Ардчилсан Үндсэн хуулиар Монголын иргэд амар тайван, эрүүл саруул амьд явах эрхтэй билээ. Хамтарсан Засгийн газрын сайд нар жип хөлөглөж сүржин сүржин reel хийж өөрөө өөрсдөдөө дурлаж байхаар “Улс төрийн хариуцлага хүлээж танхимаараа огцоръё” гэдэг санаачилга гаргаач. Л.Оюун-Эрдэнийн тархинд түрээсгүй оршсоор байгаа Ц.Элбэгдоржийг Ерөнхий сайд байхад сайд нар нь үүр цүүрээр нэг нэгэн рүүгээ утас цохиж гарын үсэг цуглуулцгаасаар хамтдаа огцорч байсан түүх бий. Л.Оюун-Эрдэнэд халаагаа өгсөн У.Хүрэлсүх таавчигтай эхийн дуулианаар танхимаараа огцрох шийдвэр гаргаж байсан. Наяад оныхон дундаас тодорсон Ерөнхий сайд гэдгээрээ Төрийн ордны хананд зургаа тавиулах эрхтэй болсон Л.Оюун-Эрдэнэд одоо “Ах нар”-ынхаа жишгийг дагахаас өөр гарц үгүй гэдгийг “Хэро” ах нь зөвлөвөл криминал цувралуудаас нь залхсан ард түмэнд nice санагдах биш үү.

Шинээр бүрдсэн УИХ 126 гишүүнтэй. Камерийн өмнө уйлж үзүүлсэн УИХ-ын гишүүд, өнчирч хоцорсон хүүгийн ярилцлагын дараа лаив хийж байр сууриа илэрхийлсэн УИХ дахь АН-ын бүлгийнхэн одоо УИХ-ын гишүүний албан бланкан дээрээ Л.Оюун-Эрдэнийг Ерөнхий сайдаас огцруулахад гарын үсгээ зурахыг харцгаая. УИХ Засгийн газрын үйл ажиллагаанд хяналт тавих эрхтэй. Ард түмний амь насыг золиосолж, хамтарсан Засгийн газар нэрийн дор төрийн албыг баруун, солгойгүй наймаалцаж буй Л.Оюун-Эрдэнийн танхимыг огцруулах эрх мэдэл 126 гишүүнд бий. Ард түмний төлөө тангараг өргөсөн УИХ-ын 126 гишүүн энэ Засгийн газарт хариуцлага тооцох эсэхийг харцгаая.

                                                                                                                                               Ж.Ананд