Ж.Баярмаа: Ерөнхий сайдыг огцруулах тухай Ч.Лодойсамбуу гишүүний санал дээр хамгийн түрүүнд гарын үсгээ зурна

         Баянгол дүүргийн 22 дугаар хороонд амьдардаг байсан нэг айлын зургаан хүн угаартаж нас барсан. Гэр бүлийнхнээ цаг бусаар алдсан О.Одбаяр өчигдөр (2025.02.06) хэвлэлийнхэнд мэдээлэл хийж "Гэр бүлийнхэн маань угаартаж амиа алдсаны хариуцлагыг төрөөс нэхэмжилнэ" гэсэн. Хүүг мэдээлэл хийсний дараа цахим орчинд "Нас барсан эмэгтэй архины хамааралтай, хүү нь хулгайн хэргээр ял сонсож байсан" гэх мэдээлэл түгж, олон нийтийн уур бухимдлыг улам хүргэлээ. "Хууль зүй, дотоод хэргийн сайд О.Алтангэрэл, ЦЕГ-ын дарга Т.Сүхболд нар хариуцлага хүлээ" гэж иргэд шаардсан хэвээр байна. УИХ-ын гишүүн Ч.Лодойсамбуу хэрэг явдлын талаар "Аль 2022 оноос хойш түлшний стандарт биш болчихоод байна аа гээд нийтээрээ шахам хашгираад байхад л бүтэн гурван өвөл юу ч хийгээгүй, ямар ч арга хэмжээ аваагүй. Монгол төр буруутан хайх шаардлагагүй. Ямар ч тайлбаргүй хариуцлага хүлээх ёстой" хэмээн байр сууриа илэрхийлж, Ерөнхий сайд Л.Оюун-Эрдэнийг огцруулах санал гаргасан талаараа өнөөдөр мэдээлэл хийв. Тэрбээр үүний өмнө "Ерөнхий сайдыг огцруулах санал гаргах тухай албан бичгээ боловсруулж байна. Албажуулахаас өмнө Ерөнхий сайдыг өөрөө улсын Ерөнхий сайд хүн шиг мэдэгдэл хийхийг хүлээж байна" цахим хуудсаар дамжуулан мэдээлсэн.

 УИХ-ын гишүүн Ж.Баярмаа "Хариуцлага тооцуулах саналын талаараа гишүүдтэй санал солилцож байгаа. Аливаа зүйлд үр дүн чухал. Бланк дээр бичээд огцорчихдог бол асуудал алга. Атал 32 хүн зурж өргөн бариад 64 кноп дарж байж огцорно. Төсвийг буцаахыг санаачилж, гарын үсэг зуруулах ажил зохион байгуулахад амаргүй байсан. Арайхийж 21 гишүүнээр зуруулсан. Байнга шүүмжилдэг, төсвийг буцаасан “зүйл ангиар” миний эсрэг элдэв кино зохион найруулж, гүтгэж байгаа. Улам ихсэх байх, хулгай хийж, хүн алаагүй тул.. айх юм алга. Би асуудал тавихдаа Ерөнхийлөгч, Ерөнхий сайд, УИХ-д хандахдаа заавал нэрийг нь цохдог. Иргэд маань гишүүдийг ядаж дарга, даамлаа нэрийг нь цохож шүүмжилдэг зоригтой болгох хэрэгтэй байна. Ч.Лодойсамбуу гишүүнтэй уулзсан. Санал нэг байгаа. Хамгийн түрүүнд зурна" гэж твиттерт бичжээ.

                                                                                                                                                      Д.Болд