Д.Энхтүвшин гишүүний туслахаар ажиллаж байсан хоёр хүнийг саатуулсан гэв үү

        МАН-ын жагсаалтаар УИХ-ын гишүүн болсон Д.Энхтүвшин өдгөө Ерөнхий сайд Л.Оюун-Эрдэнийн “шүдний өвчин” болоод байгаа. Бизнесийн салбараас улс төрд хөл тавьсан тэрбээр УИХ-ын Эдийн засгийн байнгын хороогоор Гашуунсухайт-Ганц мод боомтын хил холболтын төмөр замын талаар хэлэлцэх үеэр “Хятадын талд ашигтай, нүүрсний том хулгайг бий болгох гэрээг дэмжихгүй” гэж байр сууриа илэрхийлсэн. Саяхан хэвлэлд өгсөн ярилцлагадаа “Засгийн газрыг ордноос бус, “Гэрэгэ тауэр-”ийн 15 давхраас удирддаг болоод удаж байна. Дарга, сайд нар тэнд очиж чиглэл, даалгавар авдаг” гэж дурдсан нь өөрөө өөртөө “гал” дуудсан хэрэг болж, эсрэг талынхан нь Д.Энхтүвшин гишүүний эхнэрийн ажиллуулдаг бартай холбоотой таагүй мэдээллээр хариу барилаа. “Гэрэгэ тауэр”-ийн 15 давхарт Л.Оюун-Эрдэнийн ах Б.Баатарын оффис байрладаг гэдгийг сошиалынхан ч мэддэг болов. “Д.Энхтүвшин бол MCS угшилтай, нүүрсний бүлэглэлийн толгойлогчдын нэг” гэх сошиал суртал ухуулга идэвхжих зуур тэрбээр Ерөнхий сайд Л.Оюун-Эрдэнийн ахалдаг Эдийн засгийн бодлогын зөвлөлийн дэд даргын албанаас өөрийн хүсэлтээр чөлөөлөгджээ. Үүнээс гадна “УИХ-ын гишүүн Д.Энхтүвшингийн туслахаар ажиллаж байсан хоёр хүнийг хууль хяналтынхан саатуулсан” гэх албан бус мэдээлэл анхаарал татаж эхэллээ. Хэрэв үнэн бол энэ нь эрхэм гишүүнийг айлгах, дарамтлах ажиллагааны нэг хэлбэр байж болзошгүй юм. Улс төрд ийм технологи хэдийнэ танил болсон шүү дээ.  

                                                                                                                                                      Ж.Гал