Д.Мөнх-Эрдэнэ, Б.Цогтгэрэл хоёр Х.Баттулгын Асар, Басар нь болов уу

                   Сошиал сүлжээ гэж олон хүнд “буян” болсон талбар бий. Овсгоотой нэг нь онлайн дэлгүүр ажиллуулж олз ашиг олно. Алдаршихын донтнууд нь ямар ч хамаагүй аргаар олны анхаарлыг татаж, олон дагагчтай болно. Олон дагагчтай болсноо өөрсдийгөө “Инфлүүзэр” гэж өргөмжилнө. Инфлүүзэр болмогцоо улстөрчдийн гар, хөл болж хөлсний армийн гишүүн болно. Ичих нүүртэй нь нэр, нүүрээ нуусан тролл болдог бол ичих нүүргүйчүүд нь лаивчин болж, “Цаад эзэд”-ийнхээ өгсөн чиглэлийн дагуу өрсөлдөгчдийг нь харлуулах ажлыг гүйцэтгэдэг. Хөххотод консулаар ажиллаж байсан Д.Мөнх-Эрдэнэ тэдний тэргүүн магнайд жагсана. МАН-ын гишүүн Б.Цогтгэрэл Ц.Элбэгдоржийн үед баталсан Шилэн дансны хуулиар төрийн байгууллагуудын шилэн дансыг ухаж, сайд, дарга нарын үр ашиггүй зардлуудыг ил болгодгоороо “Шилэн” Цогоо гэгдэх болсон. Д.Мөнх-Эрдэнэ Х.Баттулгыг “Мянганы хулгайч” хэмээн цоллож, Ц.Нямдоржийн хүү Н.Анхбаяртай ГХЯ-ных нь үүдэнд барьцалдаж авах шахсанаа тухайн үед лаивдаж байв. Х.Баттулгаас гадна Сү.Батболд, Х.Нямбаатар гээд онилж галлаагүй хүн тун цөөхөн. Түүний дүү Дав.Цогтбаатар өдгөө УИХ-ын гишүүн. Хөгжлийн банкинд ажиллаж байхдаа албан тушаалаа урвуулан ашигласан хэргээр Улсын Дээд шүүхээс түүнийг гэм буруутайд тооцсон. Тиймээс Дав.Цогтбаатарыг УИХ-ын гишүүнээс эгүүлэн татах асуудал олны анхаарлыг татаж байгаа. Харин Д.Мөнх-Эрдэнэ “Мянганы хулгайч” гэж цоллож байсан Х.Баттулгынхаа сайн дүү нь болсон бололтой. Тэрбээр өчигдөр (2025.02.11) орой MCS-ийн Ж.Оджаргал, УИХ-ын гишүүн Ч.Лодойсамбуу нарын эсрэг лаив хийв. Ж.Оджаргалыг “Шуналын бузар”, Ч.Лодойсамбууг “Ямар ч боловсролгүй” гэж шоглов.

            Д.Мөнх-Эрдэнэ “Сахал” Д.Эрдэнэбилэг Монголдоо ир. Арай хорьчихгүй байх. Муу хэлүүлээд байсан Д.Эрдэнэбилэг бурхан юм байна. Ж.Оджаргал бол шуналын бузар юм байна. Тавантолгойн ордыг үнэгүй авсан” гэв. Түүнийг ийн лаивдсаны дараа “Шилэн Цогоо” “Сахал” Эрдэнэт 49 хувийг дээрэм гэж бодож явлаа. Гэтэл Ухаа худаг уурхайг тасдаж авсан Засгийн газрын тэмдэглэлийг уншаад “Сахал” Д.Эрдэнэбилэг бурхан юм байна” гэж бодлоо. Ерөнхий сайд Л.Оюун-Эрдэнэ гэж ёстой нэг үйлийн үртэй, Монгол Улс гэж алалцаж дуусахгүй олон тонуулчтай л улс юм даа” гэж жиргэлээ. Сүүлийн үед сүрхий сүжрэх болсон хоёр найзын сэдэв, өнцөг ийнхүү нэг болов. Д.Мөнх-Эрдэнэ “Улнаасаа БЭТ томилчихъё. МАН-аас “Шилэн” Цогоо, АН-аас намайг томилчих. MCS, “Энержи ресурс”-ийн лицензийг маргааш хүсэлтээ өгөөд Засгийн газраар цуцлуулна, баталгаатай. Ухаа худагийг тэмдэглэлээр авчихсан юм байна” гэв. “Эрдэнэт үйлдвэр”-ийн 49 хувийнхны эсрэг Ц.Нямдорж, “Шударга 5” тэмцэж байсан бол Ж.Оджаргал болон“Энержи ресурс” тийш Х.Баттулга Д.Мөнх-Эрдэнэ, “Шилэн” Цогоо хоёрыг Асар, Басар болгон тавьчих шиг боллоо шүү.

                                                                                                                                                    Д.Болд