"БНХАУ-ын "Чалко", “Бодь интернэйшнл” компаниудтай байгуулсан оффтэйк гэрээний хугацаа дууссан" гэв

         "ЭТТ” ХК-ийн удирдлагууд 2024 оны үйл ажиллагаа, санхүүгийн үзүүлэлтүүдээ танилцуулав.  

Өнгөрсөн онд нүүрсний үнэ буурч, нэг тонн нүүрсний дундаж үнэ 81 ам.доллар болсон ч энэ оны сүүлчээр өсөх төлөвтэй байгааг тэд онцоллоо. Нүүрсний үнэ буурсан шалтгаан нь БНХАУ-ын эдийн засгийн өсөлт удааширсан, үл хөдлөх хөрөнгийн салбарын хямрал, АНУ-ын Ерөнхийлөгч Доналд Трамп Хятадын ганд 10 хувийн импортын татвар ногдуулсан зэрэгтэй холбоотой аж. Монголын нүүрсний экспортын 40 хувийг хариуцдаг "Эрдэнэс Тавантолгой" ХК 2024 онд 1.9 их наяд төгрөгийг нүүрс тээвэрт зарцуулахаар төлөвлөсөн ч 1.1 их наяд төгрөг хэмнэжээ. Мөн 4.5 их наяд төгрөгийн цэвэр ашигтай ажилласан байна. Энэ нь 2023 оны цэвэр ашгаас 1.3 их наяд төгрөгөөр илүү ажээ. Цэвэр ашгаас 3.9 их наяд төгрөгийг ногдол ашиг хуваарилна. Тус компанийн удирдлагуудын мэдээллээс анхаарал татсан нь Гашуунсухайтын төмөр замыг “Эрдэнэс Монгол” руу шилжүүлэх замаар ногдол ашгийг компанид үлдээх хувилбарыг ярьж байгаа.

БНХАУ-ын "Чалко", “Бодь интернэйшнл” компаниудтай байгуулсан оффтэйк гэрээний хугацаа дууссан. Өнөөдрийн байдлаар, БНХАУ-ын "Норинко" групптэй байгуулсан оффтэйк гэрээний дагуу нүүрс нийлүүлж байгаа аж. Тус компани манай улсын газрын тос боловсруулах үйлдвэрийн түүхий тос дамжуулах хоолойг барьж, төлбөрт нь нүүрс авч байна. Үүнээс гадна Гашуунсухайт-Ганц мод боомтыг төмөр замаар холбох ажлын нийт санхүүжилт болох 976 тэрбум төгрөгийг "Эрдэнэс Тавантолгой" ХК гаргах аж.

                                                                                                                                                      Д.Болд