Бээжингийн марафоны үеэр хүн дүрст роботууд уралдана

       БЭЭЖИН, 2025 оны гуравдугаар сарын 15 /new-science.ru/. Яг нэг сарын дараа буюу 4 дүгээр сарын 13-нд Бээжин хотноо ер бусын спортын тэмцээн болох бөгөөд энэ нь спортын болон робот техникийн түүхэнд эргэлтийн үе болох учиртай.

Тодруулбал, Бээжингийн хагас марафон гүйлтэд оролцох 12 мянга гаруй тамирчидтай хамт тусгайлан зассан зам дээр хүн дүрст роботууд уралдах гэж байна. Зохион байгуулагчдын мэдэгдсэнээр, энэ нь робот техник ба хиймэл оюун ухааны салбар дахь Хятад улсын хамгийн сүүлийн үеийн ололт амжилтуудыг илтгэн харуулах ажээ. Роботуудын дунд хагас марафон гүйлт зохион байгуулах санаачилгыг Хятадын телевизийн CCTN суваг энэ сарын 5-нд гаргасан байна.

Дүрэм ёсоор, зөвхөн дугуйгүй бөгөөд хүнтэй адил хоёр хөлөөрөө гүйдэг хүн дүрст роботуудыг уралдаанд оролцуулна. Үүний зэрэгцээ хагас автономит хөдөлгөөнт ба бүрэн автономит хөдөлгөөнт роботууд, мөн зайнаас удирддаг роботуудыг оролцуулахыг зөвшөөрчээ. 

Эдгээр робот нь хиймэл оюун ухааны дэвшилтэт системээр тоноглогдсон тул хурд, хөдөлгөөний чиглэл, эрчим хүчний хэрэглээ зэргээ хамгийн оновчтой байдлаар тодорхойлох чадвартай байх юм.

Роботууд хүнтэй өрсөлдөж чадах уу?

Одоогийн байдлаар тэмцээнд оролцох гэж буй Хятадын хамгийн алдартай робот бол Unitree компанид зохион бүтээсэн H1 робот бөгөөд 18 км/цаг хурдалж байгаа нь хүн дүрст роботуудын дотроос хамгийн хурдан нь болж байна. Гэхдээ энэ нь мэргэжлийн марафон гүйгчдийн амжилтаас нэлээд доогуур үзүүлэлт юм. Тодруулбал, энэ оны хоёрдугаар сард Уганда улсын тамирчин Жейкоб Киплимо хагас марафон буюу 21 км-ийн зайд дэлхийн дээд амжилтыг тогтоож, уг зайг 56 минут 42 секундэд туулсан байна. Энэ нь дунджаар 22 км/цагийн хурдтайгаар гүйсэн гэсэн үг.

Харин H1 робот гүйлтийн туршид 18 км/цагийн дээд хурдаа хадгалж чадах уу гэдэг нь эргэлзээтэй. Гэсэн хэдий ч энэ удаагийн гүйлт нь робот үйлдвэрлэгч бусад компанид урам зоригийг өгснөөр робот техникийн хөгжилд чухал түлхэц болох нь дамжиггүй.