Ноорог.мн сайтад хойшлуулшгүй ажиллагаа явуулж, шөнөжин мэдүүлэг авчээ

      Ноорог.мн медиагийн үйл ажиллагаа явуулдаг байранд өнгөрсөн шөнө хойшлуулшгүй ажиллагаа явуулж, ажлын хэрэгсэл, хард, утас гэх мэт зүйлсийг хурааж, нэр бүхий ажилчдыг нь оройны 22:00 цагаас өглөөний 05:00 хүртэл мэдүүлэг авч, байцаажээ.

Ингэхдээ Эрүүгийн хуулийн 19 зүйлийн 9.1-т заасан Үндэсний эв нэгдлийг бусниулахыг завдсан гэх үндэслэлээр хойшлуулшгүй ажиллагаа явуулсан аж. Энэ нь "Хүмүүсийг үндэс, угсаа, хэл, арьсны өнгө, шашны номлол, үзэл бодлоор дайсагнуулах, эвдрэлцүүлэх, салан тусгаарлахыг ухуулсан, уриалсан, ялгаварлан гадуурхсан, хүчирхийлсэн, эрхийг нь хязгаарласан, давуу байдал тогтоосон үйлдлийг зохион байгуулсан бол 5-12 жил хүртэл хугацаагаар хорих ял шийтгэнэ. Энэ гэмт хэргийг зохион байгуулалттай гэмт бүлэг үйлдсэн бол 12-20 жил хүртэл хугацаагаар хорих ял шийтгэнэ" хэмээн заасан байдаг аж.

Тус сайтаас баривчлагдаагүй үлдсэн сэтгүүлчид өнөөдөр ЦЕГ-ын Кибер гэмт хэрэгтэй тэмцэх хэлтсийн гадна 12.00 цагаас мэдээлэл хийх юм. 

Тус медиагийн зүгээс үйл ажиллагаагаа явуулахад хүндрэл учирсан тул өнөөдөр 12:30 цагт Цагдаагийн Кибер гэмт хэрэгтэй тэмцэх хэлтсийн гадна хэвлэлийн бага хурал зарласан байна.

Ноорог.мн -ийн залуус өнөөгийн улс төр, эдийн засаг, нийгмийн байдлыг шүүмжилсэн контент бүтээдэг билээ. Тэгвэл сүүлийн үед дарамт, шахалт ирж байгаа учраас улс төртэй холбоотой контент хийхгүй гэж мэдэгдээд байсан ч шалгаж эхлээд байгаа бололтой.

Мөн тус медиа 6 бүсийн сонгуулийн үйл ажиллагааг 18 хоногийн хугацаанд бичиж авсан бөгөөд үүгээрээ баримтат кино хийж байгаа бөгөөд ирэх зургаадугаар сард нээлтээ хийх киногоороо "бөмбөг тэсэлнэ" хэмээн мэдэгдээд байсан юм.