Х нийгмийн сүлжээг хиймэл оюуныг хөгжүүлэгч компанид худалджээ

      ВАШИНГТОН, 2025 оны гуравдугаар сарын 29 /CNN/. АНУ-ын засгийн газрын үр ашгийг дээшлүүлэх агентлагийг (DOGE) тэргүүлж буй Илон Маск X нийгмийн сүлжээгээ хиймэл оюуныг хөгжүүлэгч өөрийн эзэмшлийн xAI компанид 45 тэрбум ам.доллароор худалдсан тухайгаа мэдэгджээ.

Гэрээнээс үзэхэд, X-ийн үнэлгээ 33 тэрбум ам.доллар байгаа нь 2022 онд тус сүлжээг худалдаж авсан мөнгөн дүнгээс хамаагүй бага байгаа юм.

И.Маскийн хэлснээр, хэлцлийг хувьцаа солилцох замаар хийсэн бөгөөд өрийг тооцсоноор Х-ийг худалдах өртөг 45 тэрбум ам.доллар болжээ. Харин xAI компани 80 тэрбум ам.доллароор үнэлэгдэж байгаа бололтой.

Энэхүү худалдан авалт нь xAI, X-ийг нэгтгэх шинэ боломжуудыг нээнэ гэж И.Маск мэдэгдсэн байна.

"xAI болон X-ийн ирээдүй хоорондоо харилцан шүтэлцээтэй. Өнөөдөр бид өгөгдлүүд, загварууд, тооцоолон бодох хүчин чадал, мөн хуваарилалт, мэргэжилтнүүдийг нэгтгэх алхмыг албан ёсоор хийж байна. xAI-ийн хиймэл оюуны салбарт гаргаж буй ололт амжилтуудыг X платформтой нэгтгэснээр асар их бололцоо нээгдэнэ" хэмээн тэрбээр онцлоод "нэгдсэн платформ нь илүү ухаалаг, илүү чухал хандлагыг бий болгоно" гэжээ.