Аутизмыг таниулах дэлхийн өдөрт зориулсан НҮБ-ын Ерөнхий нарийн бичгийн даргын илгээлт

        Аутизмыг таниулах дэлхийн өдөр тохиож буйтай холбогдуулан НҮБ-ын Ерөнхий нарийн бичгийн дарга Антонио Гутерриш дэлхийн хамтын нийгэмлэгт хандан илгээлт илгээжээ. 

Дэлхийн өнцөг булан бүрд аутизмтай хүмүүс нийгэм, хүн төрөлхтний хөгжил, хувь хүний амьдралд асар их хувь нэмэр оруулсаар байна. Өнөөдөр бид тэдний ололт амжилтыг тэмдэглэхийн сацуу тэдэнд тулгарч буй томоохон сорилтуудад анхаарлаа хандуулах ёстой.

Аутизмтай хүмүүс тусгаарлагдмал байдал, гадуурхал, тэгш бус байдлыг туулах үе гардаг. Ялангуяа хүнд хэцүү нөхцөлд эрүүл мэндийн үйлчилгээ авах, боловсрол эзэмших эрх нь зөрчигддөг бөгөөд эрх зүйн чадамжийг нь үгүйгэж, хүлээн зөвшөөрөхгүй байна. Ийм ялгаварлан гадуурхалт нь хөгжлийн бэрхшээлтэй хүмүүсийн эрхийн тухай конвенц, "Хэнийг ч хөгжлөөс орхигдуулахгүй" байх Тогтвортой хөгжлийн зорилготой зөрчилдөж байна. Үүнийг бид өөрчлөх ёстой.

Засгийн газар аутизмтай хүмүүсийн тэгш эрхийг баталгаажуулж, нийгмийн үйл хэрэгт бүрэн оролцох боломжийг хангасан хууль, бодлого хэрэгжүүлэх шаардлагатай. Аутизмтай хүмүүст хүртээмжтэй эрүүл мэнд, боловсролын тогтолцоо, хөдөлмөрлөх орчин нөхцөл, хот төлөвлөлтийг бий болгон, тэдэнд бусдын адил хөгжин цэцэглэх, амжилтад хүрэх тэгш боломжоор хангах ёстой. Аутизмыг таниулах дэлхийн өдрөөр бид аутизмтай нэг ч хүнийг орхигдуулахгүй нийгмийг бий болгоцгооё! гэжээ.