Д.Трамп гадаадын бүх бараанд татвар ногдуулжээ

      ВАШИНГТОН, 2025 оны дөрөвдүгээр сарын 3 /DW/. Хилийн чанадаас нийлүүлж буй бүх бараанд татвар ногдуулах тухай шийдвэрээ АНУ-ын Ерөнхийлөгч Д.Трамп өчигдөр буюу лхагва гарагт Цагаан ордны цэцэрлэгт хүрээлэнд болсон хэвлэлийн хурлын үеэр танилцууллаа.

Тэрбээр хоёр багана бүхий хүснэгтийг үзүүлсэн бөгөөд эхний баганад гадаадын улс орнуудаас Америкийн бараанд ногдуулж буй татварын хувь хэмжээ, нөгөөд нь уг татварын хариуд АНУ-ын зүгээс ногдуулж буй татварын хувь хэмжээг харуулсан байна. Уг хүснэгтийг Х нийгмийн сүлжээн дэх Цагаан ордны хуудсанд нийтэлжээ. Жишээлбэл, Америкийн тал Хятадын бараанд 34 хувь, Европын Холбооны бараанд 20 хувь, Швейцарын бараанд 31 хувь, Израилын бараанд 17 хувь, Казахстаны бараанд 27 хувь гэх мэтчилэн татвар ногдуулжээ. Хамгийн өндөр татварыг Вьетнам /46 хувь/, Камбож /49 хувь/, Лаосын /48 хувь/ бараанд ногдуулсан байна. Харин Орос улс уг хүснэгтэд бичигдээгүй байна.  

Ерөнхийлөгч Трамп өөрийн гаргасан шийдвэрийг “дэлхийн бүх улс оронд харилцан татвар ногдуулахыг зохицуулсан түүхэн зарлиг” гэж нэрлээд “өнөөдөр бол Америкийн түүхэн дэх хамгийн чухал өдрүүдийн нэг мөн” гэж тодорхойллоо. 

Тэрбээр цааш нь хэлэхдээ, АНУ-д нийлүүлж буй бүх төрлийн авто машинд 25 хувийн татвар ногдуулж буйг онцлон дурдсан байна. Уг татвар 4 дүгээр сарын 3-ны өдрөөс, харин авто машины сэлбэг хэрэгслийн импортод ногдуулсан татвар 5 дугаар сарын 3-наас тус тус үйлчилж эхлэх ажээ.