Юн Сок Ёлын шүүх хурлын явцыг сурагчдад телевизээр үзүүлжээ

         БНСУ-ын Үндсэн хуулийн цэцийн хуралдаан өнгөрөгч баасан гарагт буюу дөрөвдүгээр сарын 4-ий өдөр болж, Ерөнхийлөгч Юн Сок Ёлыг огцруулах шийдвэр гаргасан билээ. Хуралдаанд оролцсон найман шүүгчийн 100 хувийн саналаар гарсан шийдвэрийг танилцуулах шүүхийн үйл явцыг телевизээр шууд дамжуулан хүргэсэн. Харин уг хурлын үйл явцыг дунд сургуулийн ахлах ангийн сурагчдад үзүүлсэн байна. Шүүхийн өмнө буруутай бол ямар ч албан тушаалтан байсан хариуцлагаа үүрэх ёстой гэсэн зарчмыг хүүхэд, залууст суулгаж өгсөн үйл явдал болсон гэж үзсэн байна. Иймээс дунд сургуулийн ахлах ангийн сурагчдад хичээлийн үеэр телевизийн шууд дамжуулалтыг харуулжээ. Ерөнхийлөгч Юн Сок Ёл 2024 оны арванхоёрдугаар сарын 3-ны шөнө цэргийн дэглэм тогтоож, дэлхий нийтийг цочроосон шийдвэр гаргаж байсан билээ. 

БНСУ-ын Засгийн газраас Ерөнхийлөгчийн ээлжит бус сонгуулийг ирэх зургаадугаар сарын 3-ны өдрийн мягмарт гарагт явуулах товыг гаргасан. Иймээс намуудын дунд дараагийн Ерөнхийлөгчийг сонгох сонгуульд нэр дэвшигчдийг тодруулах сунгаа эхэлсэн. Өөрөөр хэлбэл, өнөөдрөөс 57 хоногийн дараа БНСУ-ын дараагийн Ерөнхийлөгч тодрох юм. 

Ардчилсан намаас хамгийн өндөр магадлалтай нэр дэвшигч бол намын дарга И Жэ Мён юм. Түүний хувьд Юн Сок Ёлд цөөн хувийн саналаар ялагдаж байсан ч 2024 оны парламентын суудалд намаа олонх болгоход гол үүргийг гүйцэтгэсэн.

Харин Ерөнхийлөгч асан Юн Сок Ёлын нам болох “Ард түмний хүч” нам дотроо хоёр хуваагдсанаас болж, улс төрийн томоохон тоглолтууд явагдаж байна. Парламент буюу Үндэсний ассамблейд суудалтай бусад намуудын хувьд Ерөнхийлөгчийн ээлжит бус сонгуульд идэвхтэй оролцох нь чухал болсныг улс төрийн дотоодын үйл явц харуулж байна. 

Ардчилсан намын дарга И Жэ Мён

                                                                                                                  Ч.БОЛОР