Дэлхийд анх удаа хүн дүрст роботуудын хагас марафон гүйлтийг зохион байгуулна

      БНХАУ-ын нийслэл Бээжин хот дэлхийд анх удаа хүн дүрст роботын хагас марафон гүйлтийг зохион байгуулах гэж байна. Хүн дүрст роботуудын хагас марафон гүйлт маргааш өглөө 07:30 цагт Бээжингийн Эдийн засаг – Технологийн хөгжлийн төв буюу Бээжин И-таунд эхлэх гэж байна.

Дэлхийн хэмжээнд анх удаа зохион байгуулагдах гэж байгаа хүн дүрст роботуудын хагас марафон гүйлтэд Хятадын 20 орчим баг өөрсдийн бүтээсэн роботуудаа уралдуулах гэж байна. Энэ уралдаан нь технологийн дэвшил, тэсвэр тэвчээрийг хамтад нь шалгах том шалгуур төдийгүй туршлага болох юм.

Хүн дүрст роботуудын Бээжин-Ижуан хагас марафоныг анх долоо хоногийн өмнө энэ сарын 13-ны өдөр зохион байгуулахаар төлөвлөсөн байсан. Гэвч Бээжинд цаг агаар огцом хүйтэрч, салхины хурд ширүүсэх урьдчилсан мэдээ гарсан. Тиймээс хагас марафонд оролцох роботууд болон тэднийг удирдах хүмүүсийн аюулгүй байдлыг хамгаалах үүднээс ийнхүү 19-ний өдөр хүртэл хойшлуулах шийдвэрийг зохион байгуулагчид гаргажээ.

Маргааш болох хагас марафонд Бээжин, Шанхай, Гуандон, Жиансу мужуудын судалгааны хүрээлэн, их сургуулиуд, технологийн компаниудын зохион бүтээгчид роботуудынхаа хамт оролцох юм.