“Татвар”-ын Д.Энхбат: Б.Хурцаас уучлалт гуйж байна

         УИХ-ын 2024 оны сонгуулиар ТЕГ-ын дарга асан Б.Хурцын эсрэг медиа ажиллагааг өргөн бүрэлдэхүүнтэйгээр явуулсан. С.Зориг агсны хамтран амьдрагч байсан Б.Булган хэвлэлд анх удаа дэлгэрэнгүй ярилцлага өгч, С.Зоригийг хөнөөсөн хэргээр гурван шатны шүүхээс ял сонссон Ц.Амгаланбаатартай хорих ангид нь очиж ярилцлага хийсэн зэргээс харвал энд зөвхөн мөнгө бус, ихээхэн эрх мэдэл үйлчилсэн нь харагдана. Энэхүү криминал цувралд Ц.Амгаланбаатартай хамт гурван шатны шүүхээс ял сонссон Т.Чимгээ, Б.Содномдаржаа, ТЕГ-ын Сөрөх тагнуулын  газрын дарга асан Д.Цогтбаатар, Н.Алтанхуягийн ахлах зөвлөх асан Л.Гансүх тэргүүтэй хүмүүс оролцсоны нэг нь “Татвар”-ын гэгдэх Д.Энхбат. ТЕГ-ын Улсын төсөв, орлого хяналтын газрын Эрсдэлийн удирдлага, судалгаа, үнэлгээний хэлтсийн дарга асан тэрбээр “Б.Хурц надаас хувийн өс хонзонгоо авч, гэмт хэрэгтэн болгосон” гэж хэвлэлд нэг бус удаа ярьсан. Харин ТЕГ-ын дарга асан Б.Хурц түүнийг шүүхэд өгч, Д.Энхбат Б.Хурцаас уучлал гуйжээ. Д.Энхбат 2025 оны дөрөвдүгээр сарын 17-нд Б.Хурцаас уучлал гуйхдаа “Миний бие Даваа овогтой Энхбат Сонгинохайрхан дүүргийн Иргэний хэргийн анхан шатны шүүхийн 113/ШШ 2018/01035 дугаар шийдвэрийн дагуу алдар нэр, ажил хэргийн нэр хүндийн эсрэг мэдээ, “Өдрийн сонин”-ы долдугаар нүүрт ярилцлага өгснийг няцааж, Б.Хурцаас уучлал эрж байна” гэж дурджээ. “Татвар”-ын Д.Энхбатын холбогдож, ял сонссон хэргийг эргэн сануулбал, Улсын Дээд шүүхийн хяналтын шатны эрүүгийн хэргийн шүүх хуралдаан 2014 оны аравдугаар сарын 31-нд болж, Ч.Гансүх, Д.Энхбат нарын 13 хүнд холбогдох хэргийг хэлэлцсэн. Тухайн үед Д.Энхбатыг хууль ёсны орлогоосоо гадна их хэмжээний орлого олж хууль бусаар хөрөнгөжсөн, эрх мэдлээ урвуулан ашигласны улмаас татварын байгууллагад онц их хэмжээний хохирол учруулсан гэмт хэрэгт хамжигчаар оролцсон, татвар ногдох их хэмжээний орлого, эд хөрөнгөө нууж, татвараас зайлсхийсэн гэмт хэрэг үйлдсэн буруутгаж 50 сая төгрөгийн эд хөрөнгө хурааж, татварын улсын байцаагч хийх эрхийг найман жилээр хасаж, чанга дэглэмтэй хорих ангид найман жил ял эдлүүлэхээр шийдвэрлэж байжээ.

                                                                                                                                                      П.Энх