Уран эсэргүүцэгчдийн халдлагад өртсөн Марк Мелеард гэж хэн бэ

      Монгол Улсын Засгийн газар 2025 оны нэгдүгээр сард Францын "Орано майнинг" компанитай хөрөнгө оруулалтын гэрээ байгуулсан. Энэ үеэс уран тойрсон гудамжны улс төр дахин идэвхжиж, УИХ-ын гишүүн С.Ганбаатар эсрэг байр суурьтай байгаагаа илэрхийлсэн.

Тэгвэл өнөөдөр (2025.04.21) нэр бүхий иргэд "Бадрах энержи" ХХК-ийн удирдлагуудтай уулзах үеэрээ танхайрч, тус компанийн гүйцэтгэх захирал Марк Мелеардын биед халдлаа. Марк Мелеардын хувьд, металлургийн инженер мэргэжилтэй. Франц хүн. "Орано" группт 2009 оноос хойш ажиллаж байгаа. Олборлолт хийж буй уурхайнуудад ажиллаж ирсэн туршлагатай. Тэр дундаа гүний болон газар доор уусган олборлох технологиор олборлолт хийдэг Нигер, Казахстан улсад хэрэгжүлж байгаа төслүүд дээр ажиллаж байсан. Монголд томилогдохоосоо өмнө "Орано" группийн төв оффист техникийн удирдлагын албанд ажиллаж байсан. Энэхүү алба нь "Орано" группээс Монгол, Канад, Узбекстан, Нигер, Казахстан зэрэг улсад хэрэгжүүлж буй төслүүдийг техникийн удирдлагаар хангадаг. Марк Мелеард 2021 оны долдугаар сараас "Зөөвч-Овоо" төслийг удирдахаар ирсэн аж.

Тэрбээр хэвлэлд өгсөн ярилцлагадаа "Монголд ажиллах сонирхлыг минь татсан зүйл бол "Зөөвч-Овоо" төсөл. Энэ төслийн үндсэн үйлдвэрлэл, олборлолт руу шилжих бүтээн байгуулалтыг удирдах үүргийг надад хүлээлгэсэн. Тиймээс төсөл дээр цөөнгүй жил ажиллах байх. Зөөвч-Овоо нь дэлхийд ураны нөөцөөрөө хамгийн том 10 ордын нэгд тооцогддог" гэж дурджээ.

                                                                                                                                                     Д.Анар