УИХ-ын чуулган: Гурилын 3 үйлдвэр нийт зах зээлийнхээ 78 хувийг үйлдвэрлэж байна

        УИХ-ын чуулганы нэгдсэн хуралдаанаар Гаалийн албан татвараас чөлөөлөх тухай хуулийг хүчингүй болгох тухай хуулийн төслийг хэлэлцэв. Гурил хямд идэх сонголтыг ард иргэдэд үлдээх эсэхийг энэ хуулийн төсөл эцэслэнэ.

Өнгөрсөн хугацаанд гурилын хэдхэн компаниуд үгсэн хуйвалдах замаар гурилын үнээ 76 хувиар нэмсэн нь импортоор хямд гурил оруулж ирэх бодлого болсон.

Харин өнөөдөр дотоодын гурил үйлдвэрлэгчид дампуурах дөхсөн учраас уг хуулийг хүчингүй болгуулахаар ХХААХҮЯ-аас оруулж ирлээ. УИХ-ын гишүүдийн зүгээс төрөөс гурил үйлдвэрлэгчдэд байнга татаас дэмжлэг олгодог боловч үнээ яагаад тасралтгүй нэмээд байдаг юм бэ гэдэг асуултыг ХХААХҮ-ийн сайдаас асуусаар байна. Гэвч дэлхийн зах зээл, үр тарианы нөхцөл байдлын улмаас үнэ нэмэгддэг гэдгээс өөр хариулт гарсангүй. Тоо баримт харвал гурилын үнэ 2023 онд 2019 оныхоос 106 хувиар өссөн байна. Өөрөөр хэлбэл 3 жилийн дотор гурилын үнээ 106 хувиар өсгөсөнд хариулт алга.

Хамгийн ноцтой нь 2023 оны гурилын үнэ 2021 оноос 76%-иар нэмэгдсэн. Гурилын гол орц улаанбуудайн үнэ огцом нэмэгдээгүй байхад гурил нь өөрөө 76 хувь нэмэгдсэн нь асуудал байгаа юм. Тиймээс ШӨХТГ-аас энэ бол монопол гэж үзэж, акт тавьсан ч гурил үйлдвэрлэгчид хүлээн зөвшөөрөөгүй. Харин импортын гурил өнгөрсөн жилээс эхлэн орж ирснээр иргэд хямд гурил идэх сонголттой болсон юм.

УИХ-ын чуулганы нэгдсэн хуралдаан завсарлалаа.