Л.Оюун-Эрдэнэ “Ерөнхий сайдаас огцоръё” гэдгээ хэлж, Г.Занданшатарыг дараагийн Ерөнхий сайд болгохоор ярьж байгаа гэв үү

          Ерөнхий сайд Л.Оюун-Эрдэнэд огцрохоос өөр зам үлдсэнгүй. Хүү, бэр хоёрынх нь тансаглал татвар төлөгч жирийн иргэдийн бухимдлыг төрүүлж, хамтарсан Засгийн газрын тэргүүн энэ бүхэнд хариулт өгч чадахгүй зугтсаны эцэст хэлсэн үг нь “Ялаа” байв. Хүйтэн бороонд төв талбайд цугларсан залуусын эсрэг шүд зуун хэлсэн үг нь энэ байсан... Олны уур бухимдал улам дэврэв. Сүхбаатарын талбайг зорих жирийн иргэдийн цуваа ч нэмэгдсээр. Ерөнхий сайд Л.Оюун-Эрдэнэд одоо бултах газар үлдсэнгүй. Тиймээс УИХ-ын дарга Д.Амарбаясгалан, Ерөнхийлөгчийн Тамгын газрын дарга Г.Занданшатар, Шадар сайд С.Амарсайхан, УИХ дахь МАН-ын бүлгийн дарга Л.Мөнхбаатар нар өнөөдөр (2025.05.19) Ерөнхий сайд Л.Оюун-Эрдэнийн өрөөнд цугларч үүсээд буй нөхцөл байдлын талаар ярилцсан. Харин дараа нь Л.Оюун-Эрдэнэ УИХ дахь МАН-ын бүлгийн хаалттай хуралдаанд оролцсон. Тэрбээр энэ үеэр МАН-ын Удирдах зөвлөл, Бага хурлыг хуралдуулах санал гаргасан аж. Гэвч УИХ-ын гишүүн Б.Энхбаяр “Л.Оюун-Эрдэнэ ээ, өөрийнхөө асуудлыг нийтийн зовлон болгох хэрэггүй” гэж эсэргүүцсэнээ сэтгүүлчдэд ярилаа. УИХ-ын гишүүд Ерөнхий сайдыг өмөөрөх гээд хөгөө чирж байгаа талаар Б.Энхбаяр бас шоглоод авлаа. Харин эрх баригч хүчний тэргүүн Л.Оюун-Эрдэнийн урилгыг хүлээн авч, хамтарсан Засгийн газар байгуулсан АН-ын дарга Л.Гантөмөр өнгөрсөн долоо хоногт сэтгүүлчдэд ээрүүлж, өгсөн хариулт нь “Замаас холд, би яаж мэддэг юм”, ХҮН намын дарга Т.Доржхандын сэтгүүлчдэд өгсөн яриа нь “Бүгдээрээ орлогоо нотолцгооё” байлаа. Л.Оюун-Эрдэнийн танхимын Шадар сайд нар болон УИХ дахь МАН-ын бүлгийн гишүүн Б.Энхбаяр нарын байр суурь, хэлсэн үгсээс харвал Ерөнхий сайд Л.Оюун-Эрдэнэд улс төрийн дэмжлэг тун бага байгаа нь харагдана. Хэдийгээр тэрбээр хамтарсан Засгийн газрыг тогтвортой байлгаж, Ерөнхий сайдынхаа эрх мэдлийг хадгалахын тулд МАН, АН, ХҮН намынханд албан тушаалыг харамгүй “бэлэглэсэн” ч энэ нь Л.Оюун-Эрдэнийн эрх мэдлийг дархалж чадахгүй байна. Улсынхаа Ерөнхий сайдад “Ялаа” гэж доромжлуулсан иргэд түүнийг огцрохыг шаардсаар байна. Тиймээс Л.Оюун-Эрдэнэд огцрох шийдвэр гаргах л үлдлээ. Түүний оронд Монгол Улсын Ерөнхийлөгчийн Тамгын газрын дарга Г.Занданшатарыг Ерөнхий сайдаар томилох хувилбар улс төрийн хүрээнд гарчээ. Л.Оюун-Эрдэнэ ч “Ерөнхий сайдаас огцорсон ч яах вэ” гэдгээ хэлсэн гэх мэдээлэл бий.

                                                                                                                                                     Ж.Болд