Шинэ Ерөнхий сайдын сураг: У.Хүрэлсүх Б.Энхбаяр, Н.Учрал хоёрын аль нэгийг, Д.Амарбаясгалан, Л.Оюун-Эрдэнэ нар С.Амарсайханыг зүтгүүлж байгаа бол Я.Содбаатар, Ж.Энхбаяр нар өөрсдийгөө сойж байна

                          МАН-ын Бага хурлын ээлжит хуралдаан маргааш (2025.05.21) 15 цагаас эхэлнэ. Хүү, бэр хоёрынхоо тансаглалд бүдэрсэн Ерөнхий сайд Л.Оюун-Эрдэнэ өчигдөр Ерөнхийлөгч У.Хүрэлсүх, УИХ-ын дарга Д.Амарбаясгалан, Ерөнхийлөгчийн Тамгын газрын дарга Г.Занданшатар, Шадар сайд С.Амарсайхан, УИХ дахь МАН-ын бүлгийн дарга Л.Мөнхбаатар, хотын мэр Х.Нямбаатар нартай Төрийн ордонд уулзсан. Үүгээр ч зогсохгүй УИХ дахь МАН-ын бүлгийн хаалттай хуралдаанд оролцож, гишүүдийнхээ үгийг сонссон. Энэ үеэр МАН-ын бүлгийн зарим гишүүн Ерөнхий сайд Л.Оюун-Эрдэнэд “Арван жилийн өмнө таны тэмцье гэж байсан МАНАН чинь одоо таны гараар МАНХАН болж замарлаа. Үндсэн хуулийн бус Засгийн газар цаашид явах аргагүй” гэж шүүмжилснийг Ч.Лодойсамбуу гишүүн сошиалд ил болгосон бол УИХ-ын гишүүн Б.Энхбаяр “Өөрийнхөө асуудлыг нийтийн зовлон болгох хэрэггүй” гэж эсэргүүцсэнээ сэтгүүлчдэд ярьсан. Харин Ерөнхийлөгч У.Хүрэлсүх Л.Оюун-Эрдэнийг хүлээн авч уулзахдаа “Өөрөө ажлаа өг” гэж хэлсэн нь үнэн болохыг улс төрийн хүрээнийхэн баталсан. Нэг ёсондоо, У.Хүрэлсүхийн зүгээс Л.Оюун-Эрдэнэд дэмжлэг үзүүлэхээргүй болсон нь энэхүү уулзалтын тухай мэдээллээс харагдав. Тиймээс Л.Оюун-Эрдэнийн хувьд, маргааш болох МАН-ын Бага хурлын үеэр огцрох тухайгаа мэдэгдэж, хамтарсан Засгийн газрын түүх төгсгөл болсныг зарлах л үлдлээ. Тэгвэл дараагийн Ерөнхий сайд хэн болох вэ...

            Төрийн ордонд өчигдөр болсон уулзалтуудтай зэрэгцэн дараагийн Ерөнхий сайдыг тодруулах тухай яриа ч давхар өрнөжээ. Халаагаа өгөх нь тодорхой болсон Л.Оюун-Эрдэнэ, УИХ-ын дарга Д.Амарбаясгалан нарын талаас Шадар сайд С.Амарсайханыг Ерөнхий сайдад зүтгүүлж байгаа аж. Д.Амарбаясгалангийн тухайд, МАН-ын Ерөнхий нарийн бичгийн даргаар олон жил ажилласан учраас Бага хурлын олонхийг багцалсан. Үүнийг нь түшиглэж С.Амарсайхан Ерөнхий сайд болохоор идэвхжиж байна. Гэвч түүний хувьд, төрсөн ах С.Отгонбаяр нь Х.Баттулгатай худ ургийн холбоотой, Туулын бургасыг үгүй хийсэн, ковидын үед эхнэр нь эмнэлгийн улаан бүсээр нэвтэрч хэл ам дэгдээж байсан, ах С.Отгонбаяр нь Онцгой байдлын сайд байх үед “Ми-8” нисдэг тэрэг осолдож олон залуус амиа алдсан зэрэг бараан намтартай нэгэн. Тэгэхээр С.Амарсайханыг дараагийн Ерөнхий сайдаар томилох тухай яриа олон нийтийн эсэргүүцэлтэй тулгарна. МАН-ын Бага хурлын гишүүдийн олонхи түүнийг дэмжиж, Ерөнхий сайд болголоо гэхэд хэрсүү ард иргэд дараагийн “ДАНХ” болгох нь тодорхой.

            Ерөнхийлөгч У.Хүрэлсүхийн “халаас”-нд хоёр кандидатын нэр бий. Нэг нь УИХ-ын гишүүн, ЗГХЭГ-ын дарга Н.Учрал, нөгөө нь УИХ-ын гишүүн Б.Энхбаяр. Н.Учралын тухайд МАН-ын дэргэдэх НАМЗХ-ны залуусаас дэмжлэг ихтэй, Х.Баттулгатай Төгрөг нуурын орд дээр дуэль хийж байгаа, Ерөнхийлөгч У.Хүрэлсүхийн итгэлийг хүлээсэн, дараагийн Ерөнхий сайд болохоор ихэд амбицтай яваа. Гэхдээ гярхай ажиглагчдын нүдээр бол тэр “Улаан коммунист”... Харин Б.Энхбаярын хувьд, өмнөх парламентын үед ХЗДХ-ийн сайд байсан. Хувь улстөрчийн хувьд эго ихтэй, камерийн тоглолт сайтай, сошиалаас оноо авах тоглолтыг сайн хийж чаддаг, мэдрэмжтэй, хамтарсан Засгийн газар, тэр дундаа Л.Оюун-Эрдэнэ болон түүний ах Б.Баатар нарын эсрэг хатуухан үг чулууддаг болсон. Төрийн ордонд шинэ Ерөнхий сайд тодруулах үйл явц ийнхүү өрнөж буйтай зэрэгцэн Тусгаар тогтнолын ордон ч хөдөлгөөнд оржээ. Д.Амарбаясгалангийн оронд МАН-ын Ерөнхий нарийн бичгийн дарга болсон Я.Содбаатар Л.Оюун-Эрдэнийн оронд Ерөнхий сайд болохоор амбицалж байгаа дуулдана. Түүнээс гадна МАН дахь далаад оны төлөөлөл болсон УИХ-ын гишүүн Ж.Энхбаяр Ерөнхий сайдын тамга атгачих санаатай уран ухаанаа уралдуулж суугаа аж. Я.Содбаатар, Ж.Энхбаяр нарын тухайд, ЖДҮ сангийн зээлтэй холбоотой дуулианд нэр холбогдсон. Я.Содбаатар тэрхүү дуулианы үеэр “Эхнэрээ ийм зээл авсныг мэдээгүй” гэж гүрийсэн ч Зам, тээврийн хөгжлийн сайдаас огцорч байсан. Ж.Энхбаяр Л.Оюун-Эрдэнийн Засгийн газарт Хүнс, хөдөө аж ахуй, хөнгөн үйлдвэрийн сайд болмогцоо яамаа Дархан-Уул аймаг руу нүүлгэж, төвийн бүсээс сонгогдсон УИХ-ын гишүүн Г.Дамдиннямд байнга шахам шүүмжлүүлж, өнгөрсөн долоо хоногт гурилын импортын татвар тэглэхтэй холбоотой хуулиас болж УИХ-ын Д.Амарбаясгаланг хэвлэлийнхэнд ховлоод амжсан. Ямартай ч Л.Оюун-Эрдэнэ огцрох нь бараг тодорхой болж, эрх баригч хүчин дэх талуудын зүгээс дээрх кандидатуудыг шинэ Ерөнхий сайдад зүтгүүлж байна.

                                                                                                                                                    С.Тулга