Ямбыг нь Л.Оюун-Эрдэнийн гэр бүл, ялыг нь Л.Гантөмөр, Т.Доржханд

                      Ерөнхий сайд Л.Оюун-Эрдэнийн тэргүүлсэн хамтарсан Засгийн газар задрах нь тодорхой боллоо. Улс төрд өрнөж буй үйл явцаас харвал, Л.Оюун-Эрдэнэ Ерөнхий сайд хэвээр үлдэхийн тулд АН, ХҮН намыг хаалганы гадна үлдээх хувилбарыг дэвшүүлжээ. Өөрөөр хэлбэл, тэрбээр АН-ын дарга Л.Гантөмөр, ХҮН намын дарга Т.Доржханд нараар туг тахихаар зэхэж байна. Л.Оюун-Эрдэнэ 2024 оны долдугаар сард УИХ-ын сонгуульд ялсан намын даргын хувьд Монгол Улсын Ерөнхий сайдаар дахин томилогдож, АН, ХҮН намтай хамтарсан Засгийн газар байгуулсан. Ерөнхий сайд, 22 сайд, 16 яамтай гүйцэтгэх засаглалд МАН-ын 13, АН-ын 8, ХҮН намын 2 сайд бий. Ерөнхий сайд Л.Оюун-Эрдэнийн танхим гурван Шадар сайдтай бөгөөд АН-ын дарга Л.Гантөмөр Тэргүүн Шадар сайд, ХҮН намын дарга Т.Доржханд Шадар сайд. Хамтарсан Засгийн газрыг бүрдүүлсэн гурван намын дарга нар 2024 оны наймдугаар сард “Хурдтай хөгжлийн төлөөх Зориг” гэдэг гэрээнд гарын үсэг зурцгаасан. Энэхүү гэрээнд МАН, АН, ХҮН намын сонгуулийн мөрийн хөтөлбөрүүдэд тусгасан гол гол заалтуудыг тусгасан юм. Харин одоо Л.Оюун-Эрдэнэ МАН-ын дарга, Ерөнхий сайдын эрх мэдлээ хадгалахын тулд АН, ХҮН намтай байгуулсан гэрээнээсээ буцаж, Л.Гантөмөр, Т.Доржханд хоёроор туг тахихаас өөр аргагүй нөхцөл байдалтай нүүр тулаад байна. Төв талбайд болж буй жагсаалын хүчийг саринуулахын тулд “Гэрэгэ тауэр”-ийн 15 давхарт байрладаг Б.Баатар ахынхаа бригадтай удтал бодож, ухаанаа уралдуулсны эцэст гаргасан хувилбар нь АН, ХҮН намынхныг засгаас “хөөж”, МАН дангаар засаглах явдал... Гэвч АН-ын дарга Л.Гантөмөр, ХҮН намын дарга Т.Доржханд нар үүнийг хүлээн зөвшөөрөх үү.

            Хамтарсан Засгийн газарт тохой залган сууж буйн хувьд Л.Гантөмөр, Т.Доржханд нар Л.Оюун-Эрдэнийг өмөөрч, сэтгүүлчдэд уураа гаргаж, бараг л уйлж, дуулах нь холгүй байв. Тэргүүн Шадар сайд Л.Гантөмөр Төрийн ордны коридорт өөрөөс нь асуулт асуусан сэтгүүлчдэд “Алив холд, би яаж мэддэг юм” гэж омогдсон бол Т.Доржханд “Зөвхөн Ерөнхий сайд ч биш төрийн өндөр албан тушаалтнууд орлогоо нотолъё” гэж Л.Оюун-Эрдэнийг олны овоо хараанаас бултуулах гэж үзэв. Гэлээ гээд Л.Гантөмөр, Т.Доржханд хоёр Л.Оюун-Эрдэнэд хүүгийнх нь найз бүсгүйн брэндийн цүнхний үнэд хүрсэнгүй. Ямбыг нь Л.Оюун-Эрдэнэ болон түүний гэр бүл, ялыг нь Л.Гантөмөр, Т.Доржханд нар үүрэх бололтой. “Сайдын суудалд шунаж, Л.Оюун-Эрдэнийн “хатавч”-нд суусан” гэх шүүмжлэлийн бай болдог Л.Гантөмөр Шадар сайдаас огцроод зогсохгүй АН-ын даргаа ч өгч таарна. Т.Доржхандын хувьд, олны дунд овоо дэмжлэгтэй байсан ХҮН намынхаа нэр хүндийг сайдын суудлаар наймаалцсан буруутан болж мөн л хариуцлага хүлээх нь тодорхой. Нэг ёсондоо, Л.Оюун-Эрдэнэ эрх мэдлээ хадгалж үлдэхийн тулд тэднийг улс төрийн үхдэл болгохоор шийджээ. “Ханилж яваад нөхрөө Хатирч яваад морио” гэдэгчлэн Л.Оюун-Эрдэнэ Монголын эдийн засгийн форум дээр хэлж байсан шигээ Л.Гантөмөр, Т.Доржханд хоёртой “Мөнхийн эвсэл” болохгүй нь ойлгомжтой боллоо. Л.Оюун-Эрдэнийн “Мөнхийн эвсэл” гэх гоё үгэнд хууртсан Л.Гантөмөр, Т.Доржханд хоёрт одоо төв талбайд очиж жагсагчидтай нэгдэх зам л үлдлээ. Харин Л.Оюун-Эрдэнэ хүү, бэр хоёрынх нь тансаглал, брэндийн цүнхний хэрүүлийг Төрийн ордноос МАН-ын цагаан байр руу чирж одов. УИХ-ын гишүүн Б.Энхбаяр өчигдөр МАН-ын бүлгийн хаалттай хуралдаан дээр Л.Оюун-Эрдэнэд “Өөрийнхөө асуудлыг нийтийн зовлон болгох хэрэггүй” гэж эсэргүүцсэн нь ч учиртай. Л.Оюун-Эрдэнийн хүү, бэр хоёртой холбоотой дуулиан эрх баригч хүчинд ямар гал өрдөж, хагарал, талцал авчрах нь маргааш болох МАН-ын Бага хурлын үеэр харагдах биз.

                                                                                                                                                      С.Тулга