Цүнхний хэрүүлийг төрийн хэрүүл болгож, МАН-ын Бага хурлыг “Ялааны алуур” болгох Л.Оюун-Эрдэнийн мэх

Улс төрд “15 давхар”-ын уналт болж байна. Л.Оюун-Эрдэнэ Ерөнхий сайдаас огцорвол хамтарсан Засгийн газрыг бүрдүүлж буй АН, ХҮН нам төдийгүй МАН-тай хамт “хад”-наас үсрэхээ сануулсан “Бат зогс” нэртэй сөрөг ПР явуулж байна. Хад асга бүхий зураг дээр “Бат зогс” гэсэн үг бичүүлээд сошиалаар нэг түгээж буй нь үүнийг илтгэнэ. Гэвч Л.Оюун-Эрдэнэ рүү чиглэсэн “Цүнх ажиллагаа” яаж эхэлсэн билээ! Хүүгийнх нь найз бүсгүй инстаграмдаа брэндийн цүнх, luxury brand шоппинг хийж буйгаа сторидсоноо гэрэл цохиулсан. Адтай зарим нь түүнийг нь гялс screen shot хийж аваад “Ерөнхий сайдын бэр брэндийн цүнх, хувцсаа гайхуулав” гэж постолсон. Түүнээс цааш хүүгийн бийлэгжүү байдал олны анхаарлыг татсан. Найз бүсгүйдээ сүйн бөгж бэлэглэж, 20 сая төгрөг шилжүүлсэн гүйлгээ ч сошиалд ил болсон. Мэдээж хэрэг, энэ дуулиан Ерөнхий сайд Л.Оюун-Эрдэнэ рүү чиглэсэн. “Орлогоо нотол” гэж олон нийт шаардсан. Гэтэл Л.Оюун-Эрдэнийн ПР-чид бэрийнх нь аавыг камерийн өмнө суулгав. Охиндоо үнэтэй машин, цүнх бэлэглэдэг бийлэгжүү аав болгож харагдуулах гэсэн биш фэйсбүүкээр түлээ зардаг нэгэн болохыг хэрсүү үзэгчид дор нь илрүүлсэн. “Галчийн худ нь түлээчин юм байна” гэдэг хошин пост ч тэр дороо хөврөв. Эцэст нь Л.Оюун-Эрдэнэ энд гарч ирэв. ПР-чдынхаа урьдчилан бэлтгэсэн камерийн өмнө зогсож байгаад “Ялаанууд намайг яаж ч чадахгүй шүү” гэж шүд зуун өгүүлэв. Цүнхний хэрүүл “Ялаа”-ны хэрүүл болов. “Ялаа”-ны хэрүүл төрийн хэрүүл болов. Яг одоо Л.Оюун-Эрдэнэ цүнхний хэрүүлийг эрх баригч МАН-ын Бага хурал руу чирж ороод эрх мэдлээ хадгалж үлдэх мэхээ хэрэглэх гэж байна. Монголын улс төрийн хамгийн том нам энэ өдөр Л.Оюун-Эрдэнийн хүү, бэрийн тансаглалаас үүдэлтэй хэрүүлийг хэлэлцэж, хамтарсан Засгийн газрын хувь заяаг шийдэх гэж байна. Ямар вэ дээ. Л.Оюун-Эрдэнийн тэргүүлж буй Засгийн газар цахим засаглалыг рекламддаг. Л.Оюун-Эрдэнэ хүү, бэрийнхээ тансаглалын эх үүсвэрийг татварын сайт руу ороод баримт болгон харуулчихад амархан атал улс даяар хагарал талцал үүсгэж, төрийн үймээн дэгдээж, МАН-ын Бага хурал цүнхний хэрүүл хэлэлцэхдээ тулж байна. Энэ доромжлол биш үү, МАН-ын Бага хурлын гишүүд ээ. МАН-ын Бага хурал гэдэг намын бодлогоо хэлэлцэн шийдвэр гаргадаг 369 гишүүнтэй нөлөө бүхий бүтэц. МАН-ын Бага хурлын шийдвэр төрийн бодлогод тусгалаа олдог. Гэтэл Л.Оюун-Эрдэнэ намынхаа Бага хурлаар цүнхний хэрүүл хэлэлцүүлж, намаа ч, засгаа ч өөрийнхөө эрх мэдлийн төлөө золиосолж байна. Цүнхний хэрүүл МАН-аар зогсохгүй АН, ХҮН намд халдварлаж, Л.Гантөмөр, Т.Доржханд хоёр улс төрийн үхдэл болохдоо тулаад байна.   

                                                                                                                                 С.Тулга