Л.Гантөмөр “будаа”!

               МАН-ын Бага хурал өчигдөр хуралдаж АН-д “Хамтарсан Засгийн газар байгуулсан гэрээгээ зөрчсөн тул цаашид хамтрахгүй” гэсэн “ял” тохлоо. Энэ бол АН-ын дарга Л.Гантөмөрт хүнд цохилт. Тэрбээр УИХ-ын 2024 оны сонгуульд жагсаалтаар нэр дэвшиж, Л.Оюун-Эрдэнийн танхимд Монгол Улсын Тэргүүн Шадар сайд бөгөөд Эдийн засаг, хөгжлийн сайд болсон. Ерөнхий сайдын хүү, бэр хоёрын тансаглалын талаар асуусан сэтгүүлчдэд уураа гаргаж “Алив холд, би яаж мэддэг юм” гэж хэлсэн нь саяхан. “Хүүхдээр улс төр хийх нь хамгийн бузар явдал шүү” гэж Л.Оюун-Эрдэнийг өмөөрсөн. Танхимынхаа тэргүүнийг ингэж өмөөрөх том шалтгаан түүнд байсан. Ерөнхий сайдыг чиглэсэн улс төрд давхар хэлмэгдэхээ Л.Гантөмөр мэдэрсэн нь гарцаагүй. Тэр ёсоор болж, цүнхний хэрүүлийн гол буруутан боллоо. Л.Оюун-Эрдэнэ “Би үхэхээр чи үх” гэдэгчлэн АН-ын дарга Л.Гантөмөр, ХҮН намын дарга Т.Доржханд хоёроор туг тахив. Т.Доржханд ч яах вэ, нэрэн дээрээ ХҮН намын дарга ч нэдэр дээрээ МАН-ын зарим лидерийн БЭТ болсныг хүмүүс мэднэ. ХҮН намаа МАН-ын “охин” нам болгочихсон түүнд алдах юм үгүй. Харин Л.Гантөмөр “будаа”. Л.Оюун-Эрдэнийн “Мөнхийн эвсэл” гэдэг гоё үгэнд маш том хууртлаа. Хүссэн ч, эс хүссэн ч МАН-ын байгуулсан Засгийн газраас АН-ын сайд нараа аваад гарахаас өөр гарцгүй боллоо. Гагц сайдаас огцроод зогсохгүй УИХ-ын гишүүнээс эгүүлэн татагдаж мэдэх эрсдэл түүнийг хүлээж байна. Учир нь Л.Гантөмөрт дургүйчүүдийн нэгдэл түүнийг Төрийн ордонд ч, АН-ын байранд ч отож байгаа. Тэдний хувьд, Л.Оюун-Эрдэнийн Засгийн газраас хөөгдсөн намын даргаа УИХ-ын гишүүнээс эгүүлэн татах акци өрнүүлэх нь тодорхой. АН дахь олонхи Л.Гантөмөрийн эсрэг хөдөлбөл асуудал тэгээд дуусна гэсэн үг. Улс төрийн намтрыг нь сөхвөл, тэрбээр 2004-2008 онд УИХ-ын гишүүн анх болж байсан. Японд боловсрол эзэмшсэн, прагматик сэтгэлгээтэй, эрүүл, зөв асуудал дэвшүүлдэг эерэг имиж нь тухайн үед Л.Гантөмөрт нэмэх оноо авчирдаг байсан. Харин 2012-2016 онд БСШУ-ны сайд байхдаа “Мүүнчин” гэх дуулианы эзнээр тодорч, Боловсролын зээлийн сангаас охиндоо зээл өгч ашиг сонирхлын зөрчил гаргасан гэж буруутсан удаа бий. Тэр ч атугай лаивчин Д.Мөнх-Эрдэнийн гол бай болж “Ярвайсан бузар” нэр зүүв. Л.Оюун-Эрдэнийн баруун гар болж шадарласан Л.Гантөмөрийн хувьд “Цүнх ажиллагаа”-нд ийнхүү оногдов. Хамтарсан Засгийн газрын танхимын үүдэнд түүнийг АН дахь “дайснууд” нь хүлээж байгаа. Тэргүүн Шадар сайд бөгөөд Эдийн засаг, хөгжлийн сайдаас огцрох нь тодорхой болсон тэрбээр АН-ын даргаа ч өгч таарна. Цаашилбал УИХ-ын гишүүнээс ч эгүүлэн татах биз. Л.Гантөмөрийн час өдрүүд ийнхүү эхэллээ.

Гэрэл зургийг Ц.Баярбаатар

                                                                                                                                  С.Тулга