Ерөнхий сайд Л.Оюун-Эрдэнэ "итгэл хүлээлгэх" тогтоолын төслийг УИХ-д оруулах бололтой

          Ерөнхий сайд Л.Оюун-Эрдэнэ "хамтарсан Засгийн газрыг ажиллуулахгүй бол өөрөө огцрох өргөдлөө өгнө" гэсэн мэдээлэл гараад байсан ч өнөөдрийг хүртэл өргөдлөө өгсөнгүй. Залуучууд Ерөнхий сайдыг орлогоо нотлохыг, огцрохыг шаардаж талбай дээр 13 хоног жагсаал хийсэн ч ямар нэгэн тайлбар хийхгүй өнөөдрийг хүрээд байгаа.

Тэгвэл өөрөө огцрох өргөдлөө өгнө гэж байсан Ерөнхий сайд Л.Оюун-Эрдэнэ УИХ-д итгэл хүлээлгэх тогтоолын төслийг оруулах бололтой. Үндсэн хуульд Ерөнхий сайд өөрөө УИХ-д итгэл хүлээлгэх тогтоолын төсөл өргөн барих хуулийн заалт бий. Тус заалт 1992 оны Үндсэн хуульд байсан бөгөөд 2019 онд процессыг нь нарийвчлан тусгасан. Монгол Улсын түүхэнд Д.Бямбасүрэн Ерөнхий сайд УИХ-д итгэл хүлээлгэх тогтоолын төслийг оруулж, санал хураалгаж байсан байна. Тэрээр итгэл хүлээлгэх үү, үгүй юү гэдгийг тухайн үеийн парламентаасаа асууж, УИХ Д.Бямбасүрэн Ерөнхий сайдад итгэл хүлээлгэж байсан түүхтэй.

/Энэ зүйлийг 2019 оны 11 дүгээр сарын 14-ний өдөр баталсан Монгол Улсын Үндсэн хуульд оруулсан нэмэлт, өөрчлөлтөөр өөрчлөн найруулсан./

Залуус нь орлогоо нотлох, огцрохыг шаардаж 13 хоног жагсаж байхад Ерөнхий сайд Л.Оюун-Эрдэнэ огцрох бус итгэл хүлээлгэх тогтоолын төслийг УИХ-д өргөн барьж, үлдэх хувилбарыг сонгосон бололтой. Уг нь Ерөнхий сайд Л.Оюун-Эрдэнэ болон түүний танхимын бодлогыг иргэд, УИХ шүүмжлээгүй, дэмжихгүй байгаа бус. Харин түүнийг орлогоо нотлохыг шаардаж буй. Ерөнхий сайд гэрийн хэргээ төрийн хэрэг болгож, улс орныг ч хоёр талцуулаад байна. Ерөнхий сайдын хүүгийн орлогоосоо давсан тансаглал нь төрийн хямрал болж хувирав. Үнэн хэрэгтээ УИХ Ерөнхий сайд, Засгийн газрын өргөн барьсан хуулийн төсөл бүрийг дэмжиж шуурхай горимоор баталдаг байсан. Гэтэл итгэл хүлээлгэх тогтоолын төслийн үндэслэл нь ямар бодлого дэмжүүлэх тухай байх вэ гэдэг нь олон нийтийн анхаарлыг татаж байна.

УИХ-д итгэл хүлээлгэх тогтоолын төсөл оруулж, санал хураалгахаар шийдсэн Ерөнхий сайд үлдэнэ гэсэн итгэлтэй, саналаа тоолчихсон учраас л энэ хувилбарыг сонгож байгаа болов уу. Түүнийг ХҮН, АН, ИЗНН-ынхан дэмжиж байгаа. Мөн өөрийнх нь парламентад оруулж ирсэн намын гишүүд нь ч дэмжинэ. Тиймээс үлдэнэ гэсэн итгэл, кноп Ерөнхий сайдад байгаа бололтой.