Л.Оюун-Эрдэнэ: Ордонд хүч мөхөстөж байгаа ч олон нийтийн хүсэл эрмэлзэл огт өөр байгааг би мэднэ

               Л.Оюун-Эрдэнийн тэргүүлсэн хамтарсан Засгийн газар өнгөрсөн лхагва (2025.05.28) гарагт хуралдаж, Ерөнхий сайдад итгэл үзүүлэх тухай УИХ-ын тогтоолын төслийг баталсан. Харин маргааш нь УИХ-д өргөн барьсан. УИХ-ын Төрийн байгуулалтын байнгын хороо өчигдөр (2025.06.02) энэхүү тогтоолын төслийг хэлэлцэж, гишүүдийн 73.9 хувь нь итгэл үзүүлэхийг дэмжсэн. УИХ дахь АН-ын бүлгийн гишүүдийн хувьд, “УИХ-ын чуулганы нэгдсэн хуралдаанд оролцохдоо асуулт асууж, үг хэлнэ. Санал хураалтад оролцохгүй” гэдэг шийдвэрийг гаргасан. Ерөнхий сайд Л.Оюун-Эрдэнийг өнгөрсөн долоо хоногт өрөөндөө хүлээн авч уулзахдаа “Ажлаа өөрөө өг” гэж хэлсэн Монгол Улсын Ерөнхийлөгч У.Хүрэлсүх УИХ-ын чуулганы нэгдсэн хуралдаанд оролцож “Ард түмнийхээ хүсэл шаардлагыг гүйцэлдүүлэхийн төлөө явна” гэж мэдэгдсэн юм. УИХ-ын гишүүд асуулт асууж, үг хэлсний дараа Ерөнхий сайд Л.Оюун-Эрдэнэд итгэл үзүүлэх тухай тогтоолын төслийг дэмжих эсэхээр нууц санал хураалт явуулсан. Нууц санал хураалтад 82 гишүүн оролцсоноос 44 нь итгэл үзүүлэхийг дэмжиж, 38 гишүүн дэмжээгүй. Ингэснээр Л.Оюун-Эрдэнэ Монгол Улсын Ерөнхий сайдаас огцорлоо. Тэрбээр УИХ-ын гишүүдэд талархал илэрхийлээд “Ордонд хүч мөхөстөж байгаа ч олон нийтийн хүсэл эрмэлзэл огт өөр байгааг би мэднэ. Үзэл санаа, үнэт зүйл хэзээ ч ялагддаггүй. Аалзны тор мэт сүлжилдсэн ашиг сонирхлын сүлжээ ард түмнийг дийлнэ гэж хэзээ ч байхгүй. Ардчилсан парламентын засаглал мөнхөд орших болтугай” гэлээ.

                                                                                                                                                      Г.Анар