Ерөнхий сайдад нэр дэвшигч Г.Занданшатар дангаараа засаглаж, бүтцээ багасгаж, төсөвт тодотгол хийнэ гэжээ ~ Analiz.mn

МАН-ын Бага хурал өчигдөр болж ЕТГ-ын дарга Г.Занданшатарыг Ерөнхий сайдад нэр дэвшүүлэх улс төрийн шийдвэр гаргасан.

Өнөөдөр Ерөнхийлөгчтэй зөвшилцөхөөр хүргүүлнэ гэдгийг МАН-ын Ерөнхий нарийн бичгийн дарга Я.Содбаатар хэлсэн. Ерөнхийлөгч шинэ нэр дэвшигчийг 5 хоногийн дотор УИХ-д өргөн мэдүүлэх хуулийн хугацаатай. Ингээд УИХ Г.Занданшатарыг Монгол Улсын Ерөнхий сайдаар томилох, эсэхийг хэлэлцэн шийдвэр гаргана. Энэ удаагийн парламент 5 намын төлөөлөлтэй, том сөрөг хүчинтэй учраас Ерөнхий сайдад нэр дэвшигчийг дэмжихгүй байх магадлалтай гэсэн байр суурь ч нийгэмд бий. Гэхдээ МАН парламентын 53.06 хувийн саналыг эзэлж байгаа учраас шинэ Ерөнхий сайд томилогдоно гэж бодож байгаа талаар МАН-ын Ерөнхий нарийн бичгийн дарга Я.Содбаатар хэлсэн. Хэрвээ МАН дангаараа Засгийн газраа бүрдүүлбэл намын гишүүдийнхээ 100 хувийн саналыг авч байж шинэ Ерөнхий сайд томилогдож чадна. Тиймээс нам доторх бүлэг, фракцуудынхаа эрх ашгийг хангаж, тэдний төлөөллийг Засгийн газартаа оруулах шаардлага үүснэ.

Өчигдөр МАН-ын Бага хурал дээр Ерөнхий сайдад нэр дэвшигч Г.Занданшатар, Г.Тэмүүлэн нараас Бага хурлын гишүүд нь асуулт асууж, хариулт авсан. Нийт 50 гаруй гишүүн асуулт асууж, үг хэлсэн бөгөөд нэр дэвшигчид өөрсдийн бодлого, хэрэгжүүлэх ажлын талаар асуултад хариулсан. Ингэхдээ олонхын санал авсан Ерөнхий сайдад нэр дэвшигч Г.Занданшатар дангаараа Засгийн газраа байгуулж, Засгийн газрын бүтцийг багасгаж, шинээр бий болгосон орон тоонуудаа бууруулна гэдгийг хэлжээ. Бага хурлын гишүүд ч олон менежер, шинэ албан тушаал бий болгосныг шүүмжилжээ. Мөн 2025 оны төсөвт тодотгол хийнэ гэдгээ хэлсэн байна. Л.Оюун-Эрдэнийн хамтарсан Засгийн газар 23 сайд, 22 яамтай үйл ажиллагаа явуулж байсан бөгөөд хамтран Засгийн газар байгуулсан АН, ХҮН намынхныг ажилд ихээр авч, төрийн албан хаагчдын тоо асар их нэмэгдээд байгаа юм. Тиймээс шинэ Ерөнхий сайд шаардлагагүй яам, орон тоог бууруулна гэдгийг хэлжээ. Ерөнхий сайд томилогдсон даруйдаа Засгийн газрын бүтэц бүрэлдэхүүний тухай хуульд нэмэлт өөрчлөлт оруулах хуулийн төслийг өргөн барьж, өөрийн танхимын бүтцээ УИХ-аар батлуулна. Үүний дараа сайд нараа УИХ-д санал болгон батлуулах хуулийн зохицуулалттай.

Эх сурвалж: Пүрэвдагва БУЛГАН itoim.mn

Ерөнхий сайдад нэр дэвшигч Г.Занданшатар дангаараа засаглаж, бүтцээ багасгаж, төсөвт тодотгол хийнэ гэжээ

Сэтгэгдэл бичих

Шинэ мэдээ

Ерөнхий сайдад нэр дэвшигч Г.Занданшатар дангаараа засаглаж, бүтцээ багасгаж, төсөвт тодотгол хийнэ гэжээ

Санал болгох

Сэтгэгдэл бичих

Шинэ мэдээ