АТГ-ын дарга З.Дашдаваа! Л.Оюун-Эрдэнийн орлогыг нотлуулж чадахгүй бол огцроорой

             З.Дашдавааг АТГ-ын даргаар улираан томилсноос хойш хоёр сар өнгөрлөө. Ерөнхий сайд асан Л.Оюун-Эрдэнэтэй нэг нутгийн, цагдаагийн байгууллагаас АТГ-т буйр сэлгэсэн түүнийг “Л.Оюун-Эрдэнийн сонгуулийн штабын менежер байсан” гэлцдэг. АТГ-ын даргаар ажиллах зургаан жил нь дуусахын алдад “З.Дашдаваа дарга маш сайн ажилласан. “Цахим эрүүл мэнд” төслийн хөрөнгийг үр дүнгүй захиран зарцуулсан БНСУ-ын “Taihan cable and Solution” компаниас 1.7 сая ам.долларын хохирлыг улсад буцаан төлүүлжээ” гэх мэдээлэл хэвлэлүүдэд гарч байв. “Цахим эрүүл мэнд” төсөлд Япон, БНСУ-ын хөрөнгө оруулалттай гэх хоёр компанийн туслан гүйцэтгэгчээр “Аксис системс” гэдэг монгол компанийг шалгаруулсан. Энэ компани нь С.Энхболдын хамаарал бүхий хүмүүстэй холбоотой. Эрүүл мэндийн сайд асан С.Энхболдыг энэ асуудлаар шалгаж, яллагдагчаар татсан гэдгийг ч сэтгүүлчид мэдээлж байсан. Гэвч эл дуулиан замхарч, С.Энхболдыг ЭМДЕГ-ын даргаар томилсон. Угтаа З.Дашдаваа АТГ-ын даргаар сайн ажилласан уу, улстөрчдийн нөлөөнд автаж сонирхлын зөрчил гаргасан уу гэдгийг С.Энхболдын кейс дээр УИХ-ын гишүүд асууж, түүнийг улираан томилох эсэхээ шийдвэрлэх учиртай байсан юм. Гэвч Ерөнхий сайд асан Л.Оюун-Эрдэнэ З.Дашдавааг АТГ-ын даргад санал болгосны дагуу УИХ-ын гишүүдийн олонхи дэмжиж албан тушаалд нь хэвээр үлдээсэн. Харин одоо АТГ-ын дарга З.Дашдаваагаас хариуцлага нэхэх цаг. Учир нь Ерөнхий сайд асан Л.Оюун-Эрдэнийн хүү, бэрийн тансаглал нийгэмд дуулиан тарьсан. Luxury brand худалдан авалт, нисдэг тэрэг хөлөглөн тансаг амралтын газарт сүй тавьсан, экс Ерөнхий сайдын хүү, бэр хоёрын тансаглалын эх үүсвэр нь юу вэ гэх мэт асуултыг иргэд өдгөө ч асууж, Л.Оюун-Эрдэнэ ба түүний гэр бүлийг орлогоо нотлохыг шаардсаар байгаа. Ерөнхий сайд асан Л.Оюун-Эрдэнэ хүүгийнхээ тансаглалын талаар “Миний хүү контент бүтээдэг” гэхээс өөр тоймтой хариулт өгөөгүй. Тэгвэл түүний хүү О.Тэмүүлэн 2025 оны тавдугаар сарын 23-нд АТГ-ын хаалгаар орж буй гэрэл зураг сайтуудад гарсан. Харин АТГ-аас өнгөрсөн сарын 15-нд “Л.Оюун-Эрдэнэ, О.Тэмүүлэн, бэрийнх нь аав, ээж болох Ч.Өгөөдэйбаатар, Н.Ариунаа нарын ХОМ-ийг шалгаж байгаа” гэдэг товч мэдээлэл өгсөн. Үнэн хэрэгтээ АТГ-ын энэхүү мэдээлэл ач холбогдол багатай, олон нийтийн зүгээс шаардаж буй шаардлагад бодитой хариулт өгөхөд эргэлзээтэй юм. Учир нь Ерөнхий сайд асан Л.Оюун-Эрдэнэ 2023 онд буюу хамгийн сүүлд мэдүүлсэн ХОМ-тээ өөрийн орлого 243 сая төгрөг, гэр бүлийн гишүүдийн орлого 15 сая төгрөг, 364 сая төгрөгөөр үнэлэгдэх нэг орон сууцтай, өр, зээл, авлагагүй, “Хэро энтертайнмент групп” ХХК-ийн 50 хувь, “Хүлэг контент” ХХК-ийг 100 хувь эзэмшдэг гэдгээ дурдчихсан. АТГ төрийн албан тушаалтны ХОМ-ийг хүлээж авмагцаа үнэн, зөв мэдүүлсэн эсэхийг нягталж, худал мэдүүлсэн бол хуулийн хариуцлага тооцдог. Тэгэхээр дээр дурдсанчлан АТГ-ын комиссарууд Л.Оюун-Эрдэнийн 2023 онд мэдүүлсэн ХОМ-ийг шалгаж байна гэдэгт итгэхэд бэрх юм. Харин Ерөнхий сайд асан Л.Оюун-Эрдэнийн хүү О.Тэмүүлэн гадаадаас ирж, АТГ-ын хаалгаар орох гэж буй гэрэл зураг хэвлэлүүдэд гарснаас хойш багагүй хугацаа өнгөрлөө. Тэрбээр тансаглалынхаа эх үүсвэрийн талаар ямар тайлбар мэдүүлэг өгсөн нь тодорхойгүй. Х.Баттулга, Ж.Мөнхбат тэргүүтэй улстөрчид АТГ-ын үүдэнд зогсож сэтгүүлчдэд ярилцлага өгч, гэрэл зургаа сошиалд байршуулдаг болсон. Гэвч зураг үлдэж, дуулиант хэргүүд замхардаг. АТГ-ын хаалгаар ороод “алга болсон” хэрэг болон эрх мэдэлтнүүд ч цөөнгүй. Шүүхээс ял сонсож, хэцүү нэртэд хоригдож байсан экс Ерөнхий сайд С.Баяр АТГ-ын байранд Х.Энхжаргал гэдэг даргаар нь дайлуулж буй бичлэг ч ил болж байв. Тэгэхээр З.Дашдаваа дарга аа, Ерөнхий сайд асан Л.Оюун-Эрдэнэ болон түүний гэр бүлийнхний тансаглалын эх үүсвэр юу вэ. Тэднээр орлогыг нь нотлуулж чадсан уу, аль эсвэл айгаад хөдөлж чадахгүй сууна уу. АТГ-ынхан ард түмэнд таалагдах спорт загасчлал хийхдээ уг нь сайнсан. “Барилаа, харууллаа, тавилаа” гээд... Ерөнхий сайд Л.Оюун-Эрдэнийн хорхойтой араанд зуугдсан УИХ-ын гишүүн Ж.Баярмаа болон түүний гэр бүлийнхнийг танай комиссарууд “Хоёрхон өдөрт багтааж орлогоо нотол” гэж чангалсан байсан. Л.Оюун-Эрдэнэ болон түүний гэр бүлийнхэн дээр ингэж удаж буйн учир юу вэ. Ард иргэд өнөөдөр өөр болсон. Албан тушаалтнуудад тавих шаардлага нь өндөрссөн. Тэд “Л.Оюун-Эрдэнээр орлогыг нь заавал нотлуулах юм шүү. Мартаж болохгүй сэдэв” гэлцэж буй энэ үед АТГ-ын дарга З.Дашдаваа та ч бас хариуцлагаас бултах учиргүй. АТГ-ын дарга гэдэг өндөр цалин, үе үе гадаад руу томилолтоор явдаг зөөлөн суудал... Ийм албан тушаалд улираан томилуулсных нь хариуг барьж, экс Ерөнхий сайдын орлогыг нотолж чадахгүй өнөөдрийг хүрсэн бол З.Дашдаваа өөрөө хариуцлага хүлээж, албан тушаалаасаа огцрох ёстой бус уу. Монгол Улс авлигын индексээр огцом ухарч, авлигачдын булайг иргэд өдөр бүр шахам дэлгэдэг болсон энэ цагт АТГ-ын дарга З.Дашдаваа албан тушаалдаа улирдаг нь ч шударга бус томилгоо байсан...  

                                                                                                                                                       Г.Анар