МАН дахь наяад оныхон П.Наранбаярыг онилж, Г.Занданшатарын танхим руу ээлжит довтолгоогоо хийж эхлэв

Ерөнхий сайд Г.Занданшатар танхимаа бүрдүүлээд удаагүй байна. Түүнийг гүйцэтгэх засаглалын тэргүүн болмогц улс төрд урвагчид ба гомдогсдын бүлэг үүсэж, эрх баригч хүчнийхэн нэг нэгнээ медиа ажиллагаагаар намнасан. Үүний үр дүнд Гадаад харилцааны сайд Б.Батцэцэг “У.Хүрэлсүх, Л.Оюун-Эрдэнэ нарын хооронд хов зөөсөн хар муужгай” нэр зүүсэн. Харин Б.Жавхлан, С.Бямбацогт, Б.Дэлгэрсайхан нарын олигархи сайд нар “Урвагч” хочтой болсон. Тиймээс Х.Баттулгын фракцийнхан энэ Засгийн газрыг “Урвагчдын Засгийн газар” гэж нэрлэв. Л.Оюун-Эрдэнэ бэрийнхээ цүнхний дуулианыг дарж чадахгүй, МАН-ын Бага хурлыг хуралдуулж байдал эвгүйтмэгц АН-ыг хамтарсан Засгийн газраас гаргах шийдвэрийг намынхнаараа гаргуулсан. Тэрбээр ийнхүү өөрийг нь хэвлэлийнхний өмнө эцсээ хүртэл хамгаалсан АН-ын дарга Л.Гантөмөрийг хамгийн түрүүнд золионд гаргаж, Г.Занданшатарын өмнө УИХ-д 42 суудалтай АН хэмээх том сөрөг хүчин буюу улс төрийн “нүх”-ийг ухаж үлдээсэн. Албан тушаал, эрх мэдлийн амтыг дөнгөж мэдэрч эхэлж байх үедээ экс Ерөнхий сайдад тонгоруулсан АН-ынхан ууртай байгаа. Тэд Г.Занданшатарыг зүгээр суулгана гэж үү! Л.Оюун-Эрдэнэ МАН-ын Бага хурлын үеэр Л.Гантөмөрийг АН-аас томилогдсон сайд нартай нь хөөх шийдвэр гаргуулсанд цочирдсон ХҮН намын дарга Т.Доржханд тухайн үед “Манай намыг урьчихаад засгаас гаргавал бид төсөөлшгүй хүчтэй сөрөг хүчин байх болно” гэж мэдэгдсэн. Аргагүй шүү дээ. Л.Оюун-Эрдэнэ УИХ-ын 2024 оны сонгуулийн дараа хамтарсан Засгийн газар байгуулж, 2028 он хүртэл эрх мэдлээ хадгалахын тулд ХҮН намын дарга Т.Доржхандад худалдан авах ажиллагаа хариуцсан Шадар сайд гэдэг Монголын хамаг том тендерүүдийг мэддэг албан тушаалыг бэлэглэсэн. Тэгэхээр Т.Доржханд тэвдэж, МАН-ынхан руу хатуу үг чулуудсаныг ойлгож болно. Харин Ерөнхий сайд Г.Занданшатар УИХ дахь хамгийн том сөрөг хүчин болох АН-ыг хаалганыхаа гадна үлдээж, ХҮН нам, ИЗНН-тэй эвссэн нь МАН дахь наяад оныхонд олз болсон байж ч мэдэх. ХҮН нам гэдэг МАН-ын охин нам, ИЗНН ч бас өнгөрсөн сонгуулиар эрх баригч хүчнийхний тоглоомын дүрмийн дагуу УИХ-д суудалтай болсон гэдгийг улс төрийн хүрээнийхэн ярьдаг. Тэгвэл Г.Занданшатар руу “захидал” илгээсэн мөнөөх 30 гишүүний төлөөлөл болох УИХ-ын гишүүн Б.Бат-Эрдэнэ, Н.Батсүмбэрэл, Б.Баярбаатар, П.Сайнзориг нар өнөөдөр (2025.06.25) Боловсролын сайд П.Наранбаярыг огцруулах санал өргөн барихаа мэдэгдлээ. Өөрөөр хэлбэл, Боловсролын сайдын суудлаа хадгалж үлдсэн П.Наранбаярыг онилж, Г.Занданшатарын танхим руу ээлжит довтолгоогоо хийж буй нь энэ. Далимд нь элсэлтийн ерөнхий шалгалтыг маапаантай асуултуудаар дүүрэн, муу зохион байгуулсан гэх хэл амны бай болж буй П.Наранбаяраар улстөржиж, шинэ гишүүдийн зүгээс олонд танигдах тактик хэрэглэж байна. МАН-ын охин нам болон өндийж, эрх мэдэлд хүрсэн ХҮН намынхан ч нийгэмд үнэн төрхөө харуулж байгаа нь үнэн. Боловсролтой, олон нийтийн хүсэн хүлээж буй шинэ цагийн лидерүүдийн төрхөөр халхавчилсан тэд үнэн хэрэгтээ эв түнжин муутай, эрх мэдэл зохихгүй хэсэг хүмүүсийн ашиг сонирхлын нэгдэл гэдэг нь ч өнгөрсөн хугацаанд болсон үйл явдлуудаас тодорхой харагдана. ХҮН намын дарга асан, өдгөө УИХ-ын гишүүн Б.Найдалаа П.Наранбаярт гар хүрч, Л.Оюун-Эрдэнэд УИХ итгэл үзүүлэх эсэхийг хэлэлцсэн тэр шөнө Б.Мөнхсоёл намынхаа талаар цочир мэдэгдэл хийсэн бол элсэлтийн шалгалтыг хэл амтай зохион байгуулж, сайд П.Наранбаярыг улалзуулсан Боловсролын үнэлгээний төвийн дарга Г.Гантуяа өнгөрсөн сард “Номадик контент” ХХК-ийнхаа нэр дээр Засгийн газрын үйл ажиллагааг сурталчлахад зориулж 790 сая төгрөгийн тендерт шалгарсан тухай мэдээлэл сошиалд ил боллоо. Г.Гантуяагийн хувьд, ХҮН намаас УИХ-ын 2024 оны сонгуульд нэр дэвшиж байсан. Юутай ч МАН дахь 80-аад оныхон элсэлтийн ерөнхий шалгалтын дуулианд дөрөөлж Боловсролын сайд П.Наранбаярыг огцруулах акциа эхлүүллээ. Хоёр ч Засгийн газар дамжин сайдын квотоо хадгалж байгаа ХҮН намынхан энэ удаад АН-ыг Л.Оюун-Эрдэнэ хамтарсан Засгийн газраас хөөх шийдвэр гаргуулсан гунигт түүхийг давтах эсэхийг харах л үлдлээ. УИХ-ын өнөөдрийн (2025.06.25) ирцийн мэдээллээр, ХҮН намын дарга Т.Доржханд гадаадад томилолтоор явсан аж. Үнэн ба зөв намын дарга А.Отгонбаатарын шидсэн өндгөнд оногдоогүй П.Наранбаяр энэ удаад МАН дахь наяад оныхны “чулуу”-нд оногдох болов уу.   

Г.Анар