Г.Занданшатар ДАРГА АНГИ-тай дайн зарлав

Улс төрд үнэн байх идеологийг тунхагласан Ерөнхий сайд Г.Занданшатар 2025 оны улсын төсөвт тодотгол хийж, 2.3 их наяд төгрөг хэмнэх тухайгаа мэдэгдсэн. Сайд асан Ч.Номингийн ШБОС болох 18 тэрбум төгрөгийн кино ваучераас эхлээд олны шүүмжлэлд өртөж, Ерөнхийлөгч У.Хүрэлсүх бүхэлд нь хориг тавьж байсан төсвийг ийнхүү дахин танахаар болов. УИХ төсвийн тодотголыг ойрын үед хэлэлцэн шийдвэрлэх учиртай. Ерөнхий сайд Г.Занданшатарын хэрэгжүүлэх дараагийн реформ нь ДАРГА АНГИ-ийг халах явдал юм. ДАРГА АНГИ гэх дабл стандарт нийгэмд хэдийнэ үүсэж, жирийн иргэдийн бухимдлыг байнга төрүүлдэг болсон нь үнэн. Тиймээс Г.Занданшатар ДАРГА АНГИ-ийг халах реформоо танхимаасаа эхлүүлэхээр болсон. Тэрбээр авлига, албан тушаалын гэмт хэрэгт холбогдсон сайдыг өчиггүйгээр огцруулахаа мэдэгдсэн бол өнөөдөр (2025.06.25) хүнд суртлыг багасгаж, шат дамжлагыг цөөлж, чиг үүргийн давхардал, хийдлийг арилгах зорилгоор яамдын газар, хэлтсүүдийг нэгтгэх, чиг үүрэг давхардсан нэгжүүдийг хасах зэргээр нэгжүүдийн тоог 31 хувиар бууруулахаар шийдвэрлэв. Үүний үр дүнд удирдах албан тушаалтны тоо 31 хувиар буурах аж. Тэргүүн Шадар сайд бөгөөд Эдийн засаг, хөгжлийн сайд Н.Учрал өнгөрсөн долоо хоногт “Манай яаманд газар, хэлтсийн 28 дарга бий. Энэ тоор арваар бууруулна” гэж мэдэгдсэн. Н.Учрал сайдын мэдээллээс анхаарал татсан нь “Жирийн албан хаагчдаас өндөр цалин авдаг дарга нартай 28 хороо, Үндэсний зөвлөлийг татан буулгана. Яамгүй гурван сайдын ажлын албадыг татан буулгаж, чиг үүргийг нь салбар хариуцсан сайд нарын мэдэлд шилжүүлнэ. “20 минутын хот”-ыг Хот байгуулалт, барилга, орон сууцжуулалтын сайд, Боомтын сэргэлтийн Үндэсний хороог Сангийн сайд хариуцна гэсэн үг. Тухайн яамны орон тоо 100-аас дээш бол долоон газартай, 100-аас бага бол таван газартай байхаар ярьсан” гэж мэдэгдсэн юм. Г.Занданшатарын танхимынхны зүгээс “14400 төрийн албан хаагчийг цомхотгоно” гэж буйн цаад зорилго нь ДАРГА АНГИ-ийг халах явдал аж. Өөрөөр хэлбэл, нам, дарга дагаж ДАРГА АНГИ-ийн эгнээнд багтсан намчид, цүнхчидийн армид хүндхэн цохилт өгч, арын хаалганыхан, шахааныхныг төрийн албанаас шахаж гаргана гэсэн үг. ДАРГА АНГИ-тай дайн зарласан Ерөнхий сайд Г.Занданшатар хүний, өөрийн намынхны эсэргүүцэлтэй ихээхэн тулгарах нь тодорхой биз ээ.

С.Тулга