У.Хүрэлсүх: Манай охид дэлхийн дэд аварга болж гайхамшиг бүтээлээ

Монголын сагсанбөмбөгийн эмэгтэй шигшээ баг FIBA 3x3 дэлхийн аварга шалгаруулах тэмцээнд өнөөдөр (2025.06.29) Польшийн шигшээ багийг ялж, алтан медалийн төлөө тоглох эрхтэй болсон. Энэхүү тоглолт 20:00 цагт болж, Монголын шигшээ баг мөнгөн медаль хүртлээ. Монгол Улсын Ерөнхийлөгч У.Хүрэлсүх цахим хуудсаараа дамжуулан шигшээ багийн тамирчдад баяр хүргэсэн юм. Тэрбээр “Дэлхийн аваргад багийн спортоор түүхэн дээд амжилт гаргаж, төрийн алтан соёмбот далбаагаа мандуулж, Монгол эмэгтэйчүүд ямар байдгийг дэлхийд зарлан тунхагласан Монгол Улсын 3х3 сагсанбөмбөгийн эмэгтэй шигшээ багтаа төр, түмнийхээ өмнөөс халуун баяр хүргэе! Монголын төр, ард түмэн Монгол эх орон монгол охид та бүхнээрээ бахархаж байна. Та бүхэн минь уйгагүй хөдөлмөр, эвийн хүчээрээ дэлхийн дэвжээнд Монголоо гоёлоо. Хоёрхон жилийн өмнөх ДАШТ-д 20 багаас 18-р байранд орж байсан манай охид олимп, дэлхийн аваргуудыг дараалан ялсаар, дэлхийн дэд аварга болж гайхамшиг бүтээлээ. Монголчууд атгасан гар шиг эв эетэй байхдаа бахдам түүх бүтээж чаддагийг энэ торгон мөчүүд яруу тодоор батлан харуулж байна. Агуу амжилт, ялалтыг бүтээсэн баг, хамт олон та бүхнийг монгол төр үнэлэх болно. Амжилтаа улам ахиулж, дэлхийн болон олимпийн тэнгэрт алтан соёмбот Төрийн далбаагаа тун удахгүй мандуулахын өлзийтэй сайхан ерөөлийг өргөн дэвшүүлье” гэлээ.

Г.Анар