Г.Өнөрбаяр: Тойргийн гишүүд "Тойрогтоо хөрөнгө оруулалт хийнэ" гэж сонгогдсон биз дээ

      УИХ-ын гишүүн Х.Баасанжаргал, М.Нарантуяа-Нара нар "Тойргоос сонгогдсон гишүүдэд 15 тэрбум төгрөг хуваарилж, төсвийн мөнгөөр угжих гэж байна" хэмээн сошиал орчинд эсэргүүцлээ илэрхийлж эхэлсэн. Үүнийг нь УИХ-ын гишүүн Ч.Номин дэмжиж буйгаа илэрхийлэв. Харин Завхан аймгийн Засаг дарга Г.Өнөрбаяр энэ талаар байр сууриа илэрхийллээ.

Тэрбээр "Тойргийн гишүүд тойрогтоо хөрөнгө оруулалт хийх гэж байна”, “тойргийн гишүүдэд 5 тэрбум хувиарлах гэж байна”, “тойргийн гишүүдэд 15 тэрбум хувиарлах гэж байна”, “Б.Жавхлан сайд тойргийн гишүүдэд хөрөнгө оруулалт нэрээр авлигадахаар бэлджээ” гэх мэтээр зохион байгуулалттайгаар бичиж эхэлж байна. Улс төрийн зорилгоор сэвэх боллоо.

УИХ-ын гишүүд чинь тойрогтоо хөрөнгө оруулалт хийх гэж амлаж сонгогдсон. Улс төрийн бүх нам хөрөнгө оруулалт хийнэ, асуудлыг ингэж шийднэ, тэгж сайжруулна гэж бодлого гаргаад сонгуульд ордог. Ард түмэн ч асуудлыг шийдвэрлэж чадна гэж итгэсэн хүмүүстээ саналаа өгдөг. Тойргийнхоо асуудлыг шийдвэрлэж, хөрөнгө оруулалт нэмэгдүүлэх гэж яваа тойргийн гишүүдийг буруутгах хэрэггүй. Завхан аймагт хөрөнгө оруулалт ус агаар шиг хэрэгтэй байна. Эсвэл хөрөнгө оруулалт хэрэггүй газар байгаа бол аймаг, сум, дүүргээр нь зарлах хэрэгтэй. Тиймээс манай аймгаас сонгогдсон 10 гишүүн минь хөрөнгө оруулалтыг нэмэгдүүлэхийн төлөө ажиллах хэрэгтэй байна. Та бүхнийг тойрогтоо ирээд иргэдтэй уулзахад хамгийн эхний асуулт хөрөнгө оруулалт байдаг шүү!!! Хамгийн түрүүнд хөрөнгө оруулалт ярьдаг иргэд, олон нийт “хөрөнгө оруулалт хэрэггүй” гээд байгаа нөхдийн эсрэг хэдэн үг хэлнэ байгаа.

Тойргийн гишүүдийг хөрөнгө оруулалтаар лоббидлоо гэдэг инээдтэй мессежээ одоо болимоор байна. Тойргийн гишүүд тулгамдсан асуудлыг шийдвэрлэх хэдэн төгрөг төсөвт суулгаад оролцоо нь дуусдаг. Бусад асуудлыг төрийн худалдан авах, салбарын яам, нийслэл, дүүрэг, аймаг, орон нутаг хариуцаад явдаг. Тэд бас дуугарах ёстой.

Хөрөнгө оруулалтын боломж нээж, асуудлыг шийдвэрлэх хувилбар гаргасан Засгийн газар, Сангийн яам, Б.Жавхлан сайд нар луу дайраад байх хэрэггүй. Харин ч улсын хэмжээний хөрөнгө оруулалтын шийдлүүд гаргаж байна. Улс төр хийх гэж байгаа бол хөрөнгө оруулалтаар улс төржмөөргүй байна. Улс төрийн өөр сэдэв олох хэрэгтэй.

Ажиглаад байхад листнийхэн маань тойргийнхонд хөрөнгө оруулалт тавилаа гээд сэвж эхэлжээ. Та бүхэн дандаа листэд суухгүй. Тойрогт нэр дэвшиж л таарна. Тэр үед хүн бүхэн асуудлаа шийдүүлэх хөрөнгө оруулалт ярьж эхэлнэ. Өнөөдрийн эсэргүүцсэн улс төр маргааш өөрийн тань асуудал болно. Тойргийн гишүүдийн хөрөнгө оруулалтыг эсэргүүцэх хэрэггүй. Харин ч дэмжих асуудал мөн.

Тойргийн гишүүд өнгөрсөн жил “алдагдалгүй төсөв” яриад шинэ хөрөнгө оруулалт бараг тавиагүй. Энэ жил “алдагдалгүй төсөв” гэдэг шиг сэдэв яриад нэмэргүй. Тойргийн гишүүдээ тойрогтоо амласан хөрөнгө оруулалтуудаа шийдмээр байна. Тойргийн гишүүд тойрогтоо хөрөнгө оруулалтыг шийдвэрлэ гэж бас давалгаалмаар байна шүү" гэв.