Л.Оюун-Эрдэнэ Монголд иржээ

        Л.Оюун-Эрдэнийг Монгол Улсын Ерөнхий сайдаас огцруулснаас хойш сар гаруй хугацаа өнгөрч байна. Хамтарсан Засгийн газрын тэргүүн байхдаа УИХ-ын чуулганы нэгдсэн хуралдаанд бараг оролцдоггүй байсан тэрбээр огцорсноосоо хойш бүр ч суухаа больсон.

 УИХ-ын чуулганыг тасалсан үзүүлэлтээрээ тэрбээр Х.Баттулгатай зуузай холбож, ажлаа хийдэггүй гишүүдийг тэргүүлж буй.

"Л.Оюун-Эрдэнэ хаана байна вэ" гэдэг асуулт ч олны дунд бий болж "Лондонд гэр бүлийнхэн дээрээ очоод Сөүлд ирсэн. Х.Баттулга, "Хэро" Б.Баатар нартай хамт БНСУ-д байгаа гэнэ" гэх баттай бус мэдээлэл ч түгсэн. Харин эх сурвалжийн мэдээлснээр, Ерөнхий сайд асан Л.Оюун-Эрдэнэ Монголд иржээ. Тэрбээр өнгөрсөн лхагва гарагт Төрийн ордонд намынхаа зарим нөхөдтэй уулзсан байна. Сонирхолтой нь Л.Оюун-Эрдэнэ Монголд ирмэгц буюу 2025 оны долдугаар сарын 23-нд АТГ түүний хүү О.Тэмүүлэнгийн орлогын эх үүсвэр хууль ёсных болох нь нотлогдсон тухай мэдээлсэн явдал юм. Өөрөөр хэлбэл, Л.Оюун-Эрдэнэ ба түүний хүү О.Тэмүүлэнгийн орлогыг нотлох гэж 60 хоног болсон АТГ-ынхан сиймхийг нь тааруулж буй мэт "Томчуудын хүүхдүүд нэгнээ зоджээ" гэх дуулиантай зэрэгцүүлэн олон нийтэд дээрх мэдээллийг хүргэсэн нь цаг хугацааны хувьд санамсаргүй давхцал байсан уу, эсвэл өөр зорилготой юу гэдэг нь анхаарал татаж байгаа юм.

Тэр тусмаа "О.Тэмүүлэнгийн орлогын эх үүсвэр хууль ёсных" гэчихээд "Хэро энтертайнмент"-ийн гүйцэтгэх захирал Б.Баатар болон А.Амундра нарт холбогдох асуудалд хэрэг бүртгэл нээж, мөрдөн шалгаж байна" гэсэн нь логикийн хувьд зөрчилдөв үү ч гэмээр. Л.Оюун-Эрдэнийн хүү, бэрийн тансаглал ид дуулиан тарьж байх үед бэрийнх нь аав Ч.Өгөөдэйбаатар камерийн өмнө "Би охиндоо цүнх, машин бэлэглэсэн" гэж ярьсан атал АТГ-аас мэдээлснээр "Хэро энтертайнмент"-ийн гүйцэтгэх захирал Б.Баатар О.Тэмүүлэнд гурван удаагийн гүйлгээгээр 300 сая төгрөг шилжүүлсэн болж хувирав.

Юутай ч Л.Оюун-Эрдэнэ эх орондоо ирж, намрын халуун улс төрийн бэлтгэлээ эхлэх гээд намынхантайгаа уулзаж байгаа бололтой. Ирэх намар МАН-ын их хурал болж Л.Оюун-Эрдэнийг намын даргаас чөлөөлөх эсэхийг шийдэх юм.

                                                                                                                                                       Д.Төгс