УИХ-ын гишүүн С.Ганбаатарыг яллагдагчаар татах саналаа АТГ-аас прокурорт хүргүүлжээ

      УИХ-ын гишүүн С.Ганбаатарыг мөнгө угаах, үндэслэлгүй хөрөнгөжих, хахууль авах гэсэн гурван зүйл ангиар яллагдагчаар татах саналаа прокурорт хүргүүлжээ.

Энэ талаар УИХ-ын гишүүн асан О.Баасанхүү цахим хуудаснаа "Зарим хүн “У.Хүрэлсүх "Босоо"-г шоронд хийх гэж байна” гэж ярьж, манай намынхан эсэргүүцэж байгаа ч үнэн хэрэгтээ "Босоо" их хэмжээний хахууль авч, түүнийгээ өөрийн туслах З-ийн нэр дээр нуусан байна. Харин З нь шоронд орохгүйн тулд уг хахуулийн талаар түүнийг илчилсэн гэж би дуулсан" гэж өчигдөр (2025.08.10) мэдээлсэн.

С.Ганбаатарын хувьд Монгол Улсын Ерөнхийлөгчийн 2017 оны сонгуульд МАХН-аас нэр дэвших үеэр "С.Ганбаатар солонгос бизнесмэнээс 50 сая вонын хандив авчээ" гэх бичлэг түгсэн. Үүнээс гадна өнгөрсөн зургадугаар сард С.Ганбаатар "АТГ-ынхан дүүгийн маань гэрт нэгжлэг хийж байна" гэж лайв хийсэн бол АТГ-ын зүгээс "С.Ганбаатар гишүүний нэр дээр бүртгэлгүй ААН-д нэгжлэг хийсэн" гэх тайлбарыг өгсөн юм.

Ямартай ч АТГ С.Ганбаатарыг яллагдагчаар татах саналаа прокурорт хүргүүлсэн. Прокурор хуульд заасан хугацаанд асуудлыг шийднэ. Хэрэв прокуророос С.Ганбаатарыг яллагдагчаар татвал УИХ-ын гишүүнийх нь бүрэн эрхийг түдгэлзүүлэх асуудлыг хөндөнө. УИХ-ын намрын ээлжит чуулган ирэх есдүгээр сард эхлэх товтой.

                                                                                                                                                        П.Уул