С.Шаарийбуу: Шүүхээс 2.1 сая ам.долларын нөхөн төлбөр тогтоосон ч Малайзын Засгийн газар болон Абдул Разак Багинда давж заалдсан

       Хоригдох ял эдэлж буй Малайзын Ерөнхий сайд асан Нажиб Разак хэрэв улс төрд эргэн ирвэл “солиотой хэрэг” болно хэмээн 2006 онд тус улсад онц хэрцгий аллагын хохирогч болсон Ш.Алтантуяа агсны эцэг Сэтэвийн Шаарийбуу Хонконгт “Bloomberg”-т ярилцлага өгөхдөө онцолжээ.

“1Malaysia Development Bhd” компанийн дуулианд холбогдож, эрх мэдлээ урвуулан ашигласан, итгэл эвдсэн болон мөнгө угаасан хэргээр 12 жилийн хоригдох ял сонссон Нажиб Разак сүүлийн үед нэр хүндээ сэргээхээр оролдож буй. Тэрбээр өнгөрсөн онд ял эдлэх хугацаагаа 6 жил болгон бууруулсны сацуу үлдсэн гурван жил орчмын хугацааг гэрийн хорионд эдлэх хүсэлтээ шүүхэд гаргаад байгаа.

“Тэр бол нэгэнт дууссан хүн. Түүнд одоо очих газар үгүй. Тэгэхээр үлдсэн ялаа шоронд эдэлнэ үү, гэртээ эдэлнэ үү хамаагүй” хэмээн охиных нь аминд хүрсэн хэргийн шударга үнэнийг тогтоохоор бараг 20 жил тэмцэж, өдгөө эцсийг нь үзэхэд тун ойртоод байгаа С.Шаарийбуу Нажиб Разакын талаар байр сууриа илэрхийлжээ.

 Ш.Алтантуяагийн амийг хөнөөсөн хэрэгт Малайз улсын Засгийн газар, Нажиб Разакийн зөвлөхөөр ажиллаж байсан Абдул Разак Багинда болон тусгай албаны хоёр цагдаад хариуцлага хүлээлгэх ёстой гэсэн шүүхийн дүгнэлт 2022 онд гарч байсан юм. Мөн Ш.Алтантуяагийн гэр бүлд учирсан хохирлыг Малайзын Засгийн газар хэрэв давж заалдах хүсэлт нь амжилтгүй болбол нэн яаралтай төлж барагдуулах ёстой гэж энэ оны хоёрдугаар сард Малайзын Холбооны шүүх шийдвэрлэжээ. Шүүхээс тогтоосон хохирлын нөхөн төлбөрийн хэмжээ одоогоор 9 сая ринггит буюу 2.1 сая ам.доллар даваад байгаа аж. Малайзын Засгийн газар болон Абдул Разак Багинда дээрх шийдвэрийг давж заалдсан бөгөөд шүүх хурал нь ирэх аравдугаар сарын 9-нд болох товтой.

Аллагыг үйлдсэн цагдаагийн алба хаагчдын нэг нь болох Азила Хадри 2019 онд мэдүүлэг өгөхдөө аллагын захиалагч нь Ерөнхий сайд асан Нажиб Разак байсныг мэдэгдэж байв. Нажиб Разак аллагын хэрэгт ямар ч оролцоогүй гэдгээ тууштай илэрхийлсээр ирсэн бөгөөд хууль шүүхээс ч түүнд уг хэрэгтэй холбоотой ямар нэг ял тулгаагүй юм. Хэрэгт холбоогүй гэдгээ мөн адил мэдэгдэж байсан Абдул Разакт хүн амины хэрэгт хамжигчаар оролцсон гэх ял тулгасан ч хожим нь хэрэгсэхгүй болгосон байна.

Харин шүүхээс цаазаар авах ял сонсоод байсан Азила Хадриг цаазын ялаас хэлтрүүлэхийг хүссэн захидлыг С.Шаарийбуу өнгөрсөн оны аравдугаар сард Малайзын Холбооны шүүхэд илгээж байлаа. Тухайн сард Холбооны шүүхээс Азила Хадрид оноосон ялыг өөрчилж, 40 жил хорих, 12 удаа ташуурдах ял болгон зөөлрүүлсэн байна.

 Аллагад буруутгагдсан хоёр дахь алба хаагч Сирул Азхар нь Австрали руу зугтсан бөгөөд Австрали улсын Засгийн газар түүнийг Малайз руу буцаавал цаазлуулах магадлалтай гэж үзэн шилжүүлж өгөхөөс татгалзжээ.

“Азила Хадри цаазаар авхуулбал гэрчгүй болно гэсэн үг. Цаазлуулах бол амархан. Харин насаараа хоригдож зовохыг нь би хармаар байна” хэмээн С.Шаарийбуу "Bloomberg"-т өгүүлж байлаа.