Ч.Лодойсамбууг Л.Оюун-Эрдэнэ, Ц.Туваан нар АН-ын даргад зүтгүүлж, О.Алтангэрэл намын дүрмийн дагуу марафоноос хасагдав

           Улс төр дэх намрын халуун өдрүүд эхэлж байна. МАН ирэх аравдугаар сард их хурлаа хийхээр товлож байгаа бол АН-ын Үндэсний бодлогын хороо (ҮБХ) 2025 оны наймдугаар сарын 28-нд хуралдана. АН-ын ҮБХ-ны хурлын үеэр Л.Гантөмөр намын даргын ажлаа өгөх нь тодорхой болсон бол Л.Оюун-Эрдэнэ эрх баригч хүчний их хурлаар МАН-ын даргын тамгаа Г.Занданшатарт өгөх үү, өөр кандидатад “бэлэглэх” үү гэдэг нь улс төрийн хүрээнд анхаарал татсан сэдэв болоод байна. АН-ынхны хувьд намрын улс төрөө идэвхжүүлж Улс төрийн зөвлөлөө өчигдөр (2025.08.20) хуралдуулан Л.Гантөмөрөөс “АН-ын даргаа өгнө” гэдэг ам өчгийг нь авсан. Харин УИХ дахь олонхийн итгэл, дэмжлэгийг авч чадалгүй Ерөнхий сайдаас огцорсон Л.Оюун-Эрдэнэ гадаадаас ирж, нууц уулзалтууд хийж буйг зарим хэвлэл мэдээлсэн. Түүнийг АН-ын ҮБХ-ны ээлжит хурлыг угтаж, УИХ-ын гишүүн Ч.Лодойсамбууг тус намын даргад зүтгүүлэх хорыг Ц.Туваантай хамт найруулж байгаа талаар улс төрийн хүрээнийхэн ярьж байна. Ч.Лодойсамбуугийн тухайд, өнгөрсөн хугацаанд Л.Оюун-Эрдэнийн эсрэг улс төрийн гол дүрд тоглож байсан ч Л.Оюун-Эрдэнэтэй гар барьж, “15 давхар”-ын лифтээр аль хэдийнэ өгсчээ. Гэвч Л.Оюун-Эрдэнэ, Ч.Лодойсамбуу хоёрыг хэн эвлэрүүлж, чухам ямар ашиг сонирхол дээр тэд нэгдсэн нь сонирхол татна. АН-ын шинэ даргад Ч.Лодойсамбууг зүтгүүлэхэд Л.Оюун-Эрдэнэтэй хүч хавсарч буй Ц.Туваан Г.Занданшатарыг Ерөнхий сайдаар томилогдох үед “Тантай хамтран ажиллахад бэлэн АН-ын сайд нар бий шүү” гэж хэлсэн удаатай.

            Х.Баттулга болон “15 давхар”-аас АН-ын даргын марафонд сойж байгаа өөр нэг хүн бол О.Алтангэрэл. Тэрбээр хамтарсан Засгийн газарт Хууль зүй, дотоод хэргийн сайд байхдаа “Х.Баттулга, Л.Оюун-Эрдэнэ хоёрын нохойд барьдаг мод” гэгдэх болсон. Тиймээс О.Алтангэрэл олон нийтийн болон АН дахь Х.Баттулгын эсрэг фракциудын дэмжлэгийг авч чадахгүй. Тус намын дүрэмд “Сүүлийн найман жил ҮБХ-ны гишүүнээр сонгогдсон хүнийг АН-ын даргаар сонгоно” гэсэн заалт бий. О.Алтангэрэлийн тухайд, энэхүү шаардлагыг хангаж чадахгүй тул АН-ын даргын марафоноос хасагдаж байгаа аж. АН дахь Х.Баттулгын эсрэг фракциуд хүчээ нэгтгэсэн энэ үед Л.Гантөмөртэй хамт Л.Оюун-Эрдэнийн Засгийн газраас хөөгдсөн О.Алтангэрэлийг АН-ын даргад зүтгүүлнэ гэдэг ёстой л “15 давхар”-ын уналт юм даа.

                                                                                                                                                       Г.Анар