Л.Оюун-Эрдэнэ МАН-ын даргын тамгаа Д.Амарбаясгалан, Г.Тэмүүлэн нарын аль нэгэнд өгөх тохироог хийсэн үү

                  Ерөнхий сайд асан Л.Оюун-Эрдэнэ Өвөрхангайд амрах зуураа МАН, АН-ынхантай уулзаж, ирэх аравдугаар сард хуралдах намын их хурал болон УИХ-ын нөхөн сонгуулийн талаар ярилцсан талаар эх сурвалжууд мэдээлж байна. Тэрбээр АН-ынхныг Өвөрхангайд дуудаж уулзсан нь учиртай. Өнгөрсөн сонгуульд АН-ын нэр дэвшигчид хангайн бүсэд ялалт байгуулсан. Харин тус бүсээс УИХ-д сонгогдсон Дав.Цогтбаатарыг УИХ-ын гишүүнээс эгүүлэн татах асуудал улс төрийн хүрээнд шийдлээ ололгүй, шүүхийн шийдвэр тоосонд дарагдсан хэвээр байгаа. Тиймээс Ерөнхий сайд асан Л.Оюун-Эрдэнэ АН-ынхны энэ эмзэг сэдэвт дөрөөлж, тэдэнтэй нөхөн сонгуулийн талаар ярилцсан бололтой. Харин МАН-ынхантай намын ээлжит их хурлын талаар ярилцаж, МАН-ын даргын тамгаа гардуулж өгөх кандидат дээр байр суурийг нь сонссон болов уу гэх таамаг бий. Экс Ерөнхий сайд Өвөрхангайд амрах далимдаа улс төрийн уулзалтуудаа ийнхүү хийснийхээ дараа УИХ-ын дарга Д.Амарбаясгалангийн зохион байгуулсан уулзалтад оролцохоор Архангайд хүрэлцэн иржээ. Цэнхэрийн амралтад болсон энэхүү “party”-д Д.Амарбаясгалан, Л.Оюун-Эрдэнэ нарын фракцийнхан буюу Н.Алтаншагай, А.Ариунзаяа, Ж.Бат-Эрдэнэ, О.Батнайрамдал, М.Ганхүлэг, Д.Ганмаа, С.Зулпхар, М.Мандхай, Ч.Номин, Ц.Идэрбат, Г.Тэмүүлэн, Ц.Сандаг-Очир нарын гишүүд оролцсон талаар зарим хэвлэл мэдээлсэн. Өөрөөр хэлбэл, Л.Оюун-Эрдэнэ, Д.Амарбаясгалан нарын дэмжлэгээр МАН-аас жагсаалтаар УИХ-ын гишүүн болсон А.Ариунзаяа, Д.Ганмаа, М.Мандхай нар Цэнхэрийн амралтад дуудагдсан байна. Харин Л.Оюун-Эрдэнийн Говьсүмбэрт хийсэн уулзалтад Э.Бат-Амгалан тэргүүтэй МАН-ынхан очжээ. Э.Бат-Амгалангийн хувьд, хотын мэр Х.Нямбаатарын фракцийнх бөгөөд Ерөнхий сайд Г.Занданшатарын танхимд Хот байгуулалт, барилга, орон сууцжуулалтын сайдаар ажиллаж байгаа. Ерөнхий сайд Л.Оюун-Эрдэнэ болон “15 давхар”-ынхны зүгээс урвагчдыг тодруулах акциа өдгөө ч үргэлжлүүлж байгаа. “Хэн хэн надаас урваж намайг огцруулсан бэ” гэдэг гомдол, хорслоо ч Л.Оюун-Эрдэнэ дарж ядан яваа. Тиймээс тэрбээр МАН дахь далаад оныхон буюу У.Хүрэлсүх, Г.Занданшатар нарт МАН-ын даргын тамгыг гардуулж өгөх биш, наяад оныхонд бэлэглэх тохироог хийж яваа болов уу гэх таамаг бий. Л.Оюун-Эрдэнийн тухайд, барьцгүй улс төр хийдгийг улс төрийн хүрээнийхэн хийгээд иргэд ч өнгөрсөн зун огцрохынхоо өмнө хийсэн алхмуудаас нь тодорхой харсан байх. Ерөнхийлөгч У.Хүрэлсүхийн өрөөнд орж “Өөрөө өргөдлөө өг” гэдэг үг сонссоныхоо дараа МАН-ын Бага хурлыг хуралдуулж АН-ыг Засгийн газраас хөөх шийдвэр гаргуулсан шүү дээ. Тиймээс Л.Оюун-Эрдэнэ ирэх аравдугаар сард хуралдахаар албан бусаар товлосон МАН-ын их хурлын өмнө улс төрийн ямар драма дэглэхийг таашгүй. Харин тэрбээр У.Хүрэлсүхэд гомдсон гомдлоо Г.Занданшатарт гаргаж, МАН-ын даргын тамгаа УИХ-ын дарга Д.Амарбаясгалан, УИХ-ын гишүүн Г.Тэмүүлэн хоёрын аль нэгэнд өгөхөөр тохиров уу гэдэг нь анхаарал татаж эхэллээ. Эрх баригч хүчнийхний хувьд “МАН-ын даргад Г.Занданшатартай өрсөлдөх хүчтэй лидер гэвэл УИХ-ын дарга Д.Амарбаясгалан л байна” гэлцэж байна. Гэвч Д.Амарбаясгалан “Үгүй” гэвэл өөр хэн байж таарах вэ. УИХ-ын гишүүн Г.Тэмүүлэн... Тэрбээр Л.Оюун-Эрдэнийг УИХ Ерөнхий сайдаас огцруулсны дараа Ерөнхий сайдын албан тушаалд Г.Занданшатартай өрсөлдсөн. Тухайн үед Л.Оюун-Эрдэнийн фракцийнхан болон МАН дахь наяад оны зарим төлөөлөл Г.Тэмүүлэнг дэмжиж саналаа өгсөн гэдэг. МАН-аас гадна Үндэсний эвслийн тэргүүн Н.Номтойбаяр ч түүний найз. Н.Номтойбаярын тухайд, Ерөнхий сайд Г.Занданшатарын урилгыг хүлээн авч танхимд нь орж ажиллахаас татгалзаж байсан. Л.Оюун-Эрдэнэ, Н.Номтойбаяр нар цагтаа түнжин хагарч байсан ч Г.Тэмүүлэнг МАН-ын дарга болгох дээр эрх ашиг нэгдсэн байх магадлалтай. Тэгэхээр Л.Оюун-Эрдэнэ У.Хүрэлсүх, Г.Занданшатар нарын эсрэг МАН, АН-д блок үүсгэж, намрын халуун өдрүүдээ эхлүүлж байгаа нь тодорхой. Ерөнхий сайдаас огцорсон ч түүнд УИХ-д олонхи суудалтай МАН-ын даргын эрх мэдэл бий. Тиймээс эрх баригч хүчний тэргүүний хувьд дэмжиж УИХ-ын гишүүн болгосон жагсаалтынхан болон тойргоос сонгогдсон гишүүдийнхээ хүчийг хөдөөд хийсэн уулзалтуудаараа төвлөрүүлж байгаа болов уу. Хэрэв Л.Оюун-Эрдэнийн МАН, АН-ынхантай хийж буй уулзалтууд үр дүнд хүрч, тэрбээр МАН-ын даргын тамгаа наяад оныхондоо шилжүүлбэл ирэх өвөл улсын төсөв хэлэлцэх үеэр Ерөнхий сайд Г.Занданшатарыг огцруулах дайралтаа хийх үү гэдэг асуулт ч гарч ирнэ. Өнгөрсөн зун УИХ-ын гишүүн М.Нарантуяа-Нара, Ч.Номин, Х.Баасанжаргал нар “Засгийн газар тойрог тус бүрт таван тэрбум төгрөг тусгах нэрийдлээр УИХ-ын гишүүдийг хахуульдах гэж байна” гэдэг дуулиан дэгдээсэн. Хэдийгээр энэ дуулиан Сангийн сайд Б.Жавхлангийн “Гишүүдээс тойргуудад хийх хөрөнгө оруулалтын талаар санал авсан төдий” гэх тайлбартайгаар хэсэг намжсан ч УИХ-ын гишүүн Ч.Лодойсамбуу намрын чуулганаар Ерөнхий сайдад тойрог бүрт хуваарилах таван тэрбум төгрөгийн талаар асуулга тавихаар болсноо мэдэгдсэн. Ч.Лодойсамбуугийн хувьд, АН-ын даргын марафонд Л.Оюун-Эрдэнээс далд дэмжлэг авч байгааг намынхан нь ярьж байгаа. Тэгэхээр ирэх өвөл улсын төсөвтэй холбоотой улаан хэрүүл болох үеэр Л.Оюун-Эрдэнийн бригадынхан Г.Занданшатарын эсрэг хөдөлж мэдэх л юм. Л.Оюун-Эрдэнэд УИХ дахь МАН, АН-ын кнопчидоос гадна Х.Баттулга гэж “Том ах” бий. Л.Оюун-Эрдэнэ улс төрд хүч, нөлөөгөө алдахыг тэр хүсэхгүй. Тиймээс Ерөнхий сайдаас огцорсон ч МАН дахь эрх мэдлээ хадгалж үлдэх мэхийг Х.Баттулга Л.Оюун-Эрдэнэд зааж зөвлөж ч байгаа биз. МАН Х.Баттулга гэдэг де факто даргатай болсоор удлаа шүү дээ.   

                                                                                                                                   С.Тулга