"Gazprom”-ын гүйцэтгэх захирал Алексей Миллер Ерөнхийлөгч У.Хүрэлсүх, Ерөнхий сайд Г.Занданшатар нартай уулзжээ

       ОХУ-ын Төрийн өмчит, байгалийн хийн “Gazprom” компанийн Гүйцэтгэх захирал Алексей Миллер мягмар гарагт Монгол Улсад зочилж, хоёр улсын эрчим хүчний хамтын ажиллагааны асуудлаар Төрийн өндөр албан тушаалтнуудтай уулзсаныг тус компани “Telegram” сувгаараа дамжуулан мэдээлжээ.

Алексей Миллер Монгол Улсын Ерөнхийлөгч У.Хүрэлсүх, Ерөнхий сайд Г.Занданшатар нартай ажлын уулзалт хийж, хамтын ажиллагааны цаашдын ирээдүйн талаар санал солилцсон байна. Мөн тэрбээр Шадар сайд С.Амарсайхантай уулзаж, Монгол Улсын Засгийн газартай газрын тос, байгалийн хийн салбарт түншлэх хамтын ажиллагааны санамж бичиг байгуулсныг мэдээлжээ.

ОХУ-аас Монголын нутаг дэвсгэрээр дайруулан БНХАУ руу байгалийн хий дамжуулах “Сибирийн хүч II” хоолойн төсөлд "Gazprom" голлох үүрэгтэй оролцох юм. Сүүлд Шадар сайд С.Амарсайхан БНХАУ-аас Монгол Улсад суугаа Элчин сайд Шэнь Миньжуанийг хүлээн авч уулзахдаа “Сибирийн хүч II” хоолойн төслийн асуудлаар гурван талт уулзалтыг ойрын хугацаанд зохион байгуулах тухай санал солилцсон юм.

Харин ОХУ, БНХАУ-ын талууд хооронд төслийн өртгийн асуудлаар санал зөрөлдсөний улмаас яриа хэлэлцээ гацаанд орсон, албан ёсны гэрээ хийгдээгүй хэвээр байгаа юм.