О.Цогтгэрэлийг АН-ын дарга болгохын эсрэг Жэнко, MCS фракцийнхан нэгджээ

АН-ын ҮБХ-ны хурал маргааш (2025.08.28) болно. Харин тус намын их хурлыг энэ сарын 31-нд хийхээр товлосон. МАН-ын Бага хурал хуралдаж, хамтарсан Засгийн газраас АН-ыг хөөсний дараа Л.Гантөмөр “АН-ын даргын ажлаа өгнө” гэж мэдэгдсэн. Өнгөрсөн долоо хоногт хуралдсан Улс төрийн зөвлөлийн хурлаар тэрбээр энэхүү байр сууриа дахин илэрхийлснийг намынхан нь мэдээлсэн. Тиймээс АН-ын шинэ даргын төлөөх марафон фракциудынх нь дунд ширүүхэн өрнөж байна. MCS-ийнхнээс УИХ-ын гишүүн Ч.Лодойсамбууг, Жэнко Х.Баттулгынхнаас О.Алтангэрэл, Л.Мөнхбаясгалан нарыг торгуулийн суман болгож илгээлээ. Харин АН дахь анти Жэнко нэгдлээс УИХ-ын гишүүн О.Цогтгэрэлийг зүтгүүлж байна. Гэвч АН-ыг дахин хүчтэй сөрөг хүчин болгож, УИХ-ын 2028 оны сонгуульд ялуулах лидер хэн байх вэ. АН бол үндэсний хэмжээний хоёр дахь том нам. Энэ намыг ялж, ялагдаж үзсэн, улс төрд хат суусан, хашир туршлагатай, хүлээн зөвшөөрөгдсөн лидер удирдах ёстой гэдгийг тус намынхан хэлж байна. Сошиалд бичиж байгаачлан Ерөнхий сайд болох хэмжээний ранктай улстөрч АН-ын дарга болох ёстой… Тиймээс АН дахь анти Жэнко нэгдлийнхэн О.Цогтгэрэлийг “Улс төр, бизнесийн салбарын туршлагатай. Либерал үзэл баримтлалтай, тулхтай, АН дахь фракциудын балансыг тохируулж чадах кандидат” гэж үзэж буй учраас дэмжиж байгаа аж. Гэвч MCS, Жэнко Х.Баттулгынхан үүний эсрэг байр суурьтай байгаа бөгөөд Ч.Лодойсамбуу, О.Алтангэрэл, Л.Мөнхбаясгалан нарыг эсрэг буланд нэр дэвшүүлжээ. УИХ-ын гишүүн Ч.Лодойсамбуугийн хувьд өнгөрсөн сонгуульд MCS, АПУ-аас дэмжлэг авч өрсөлдсөн гэлцдэг. Тэрбээр УИХ-ын гишүүнээр анх удаа сонгогдсон. АН-ын даргын марафонд өрсөлдөнө гэдэг Ч.Лодойсамбуугийн тухайд улс төрийн рингэн дээр имижээ өсгөх тоглолт. ХҮН намаас АН-д элсэж, Жэнко Х.Баттулгын хүн гэгдэх болсон О.Алтангэрэл ч анх удаа УИХ-д сонгогдсон. Л.Мөнхбаясгалангийн хувьд ч мөн ялгаагүй. Тэгэхээр тэдний хувьд АН-ын дарга болох боломжгүй. АН-ын дүрмийн 5.17.4-т “Намын даргад нэр дэвшигч нь үндсэн дүрэм зөрчиж шийтгэл хүлээгээгүй, намд элсээд 10 жил болсон, тухайн үеийн хүчин төгөлдөр ҮБХ-ны нийт гишүүдийн 10 хувийн дэмжлэгийг авч гарын үсэг зуруулсан, намын сонгуульд гишүүн (ҮБХ, ҮЗХ)-ээр дөрвөөс доошгүй жил ажиллаж байсан гишүүн байна” гэж заасан.

Г.Анар