Ү.Сарнай: Манай гэр бүл болон Б.Хурц Х.Баттулгаас уучлал, өршөөл хүсээгүй. Х.Баттулга өөрөө тийм үг дамжуулсан

ТЕГ-ын дарга асан Б.Хурцад Ерөнхийлөгч асан Х.Баттулга уучлал үзүүлж сулласан гэх яриа АН-ын ҮБХ болохын өмнөх өдөр дахин гарлаа. Энэ талаар Б.Хурцын эхнэр Ү.Сарнай фэйсбүүкт “Миний нөхөр болон гэр бүлийн зүгээс Ерөнхийлөгч асан Х.Баттулгаас уучлал, өршөөл хүсээгүй. Харин өөрөө тийм үг дамжуулахад нь миний бие 2021 оны зургадугаар сарын 22-нд ийм мэдэгдэл хүргүүлсэн байдаг юм. “Миний нөхөр өөрөө болон бид “Гэм буруугүй” гэж үзсэн хэвээр байгаа тул Монгол Улсын Ерөнхийлөгчийн бүрэн эрхийн дагуу уучлал үзүүлэхгүй байхыг хүсье” гэж. Бас шоронд хоригдсон орой нь ардчилсан Ерөнхийлөгчөөс хэргийн материалыг бүхэлд нь нууцаас гаргуулахыг хүссэн мессэж явуулсан байдаг” гэж бичжээ. Х.Баттулга Монгол Улсын Ерөнхийлөгчийн албан тушаалаас буухынхаа өмнөхөн буюу 2021 оны зургадугаар сарын 24-нд зарлиг гарган зарим хүнд уучлал үзүүлсний дотор Б.Хурцыг багтаасан юм. ТЕГ-ын дарга Б.Хурцын хувьд эрүүдэн шүүлттэй холбоотой хэрэгт буруутгагдаж ял сонссон талаараа “Би гүйцэтгэх ажлын төлөвлөгөө л баталсан. Үүний төлөө намайг ялласан” гэсэн тайлбарыг нэг бус удаа өгсөн. Б.Хурц, түүний гэр бүлийн зүгээс С.Зоригийг хөнөөсөн хэрэг, Д.Энхбат агсантай холбоотой хэрэг, мөн эрүүдэн шүүсэн гэх хэргийг улсын нууцаас гаргуулах талаар Монгол Улсын Ерөнхийлөгч, УИХ-ын дарга, Ерөнхий сайд, ТЕГ-ын дарга, Улсын ерөнхий прокурорт хэд хэдэн удаа хандсан ч өдгөөг хүртэл таг чиг байсаар байгаа.

Г.Анар