У.Хүрэлсүх, С.Баярцогт нар нэн шинэ МАНАН байгуулж, Г.Занданшатарын танхимд АН-ынхан орж ирж магадгүй боллоо

        О.Цогтгэрэл АН-ын ҮБХ-ны 314 гишүүнээс 196 хүний санал авч, АН-ын дарга боллоо. УИХ-ын гишүүнээр хоёр дахиа сонгогдон ажиллаж буй түүнийг “ТЭСО” корпорациар нь овоглодог. Харин улс төрд Х.Баттулгын дэмжлэгтэй нэг хэсэг явсан ч “Жэнко” гэдэг сүүдэр алсарсныг АН-ынхан ярьдаг. Үүнээс гадна UBS хэмээх улс төр, бизнес дамнасан бүлэглэл бий. Энэ бүлэглэл Н.Энхбаярын үед бий болж хүчирхэгжсэн. МАН, АН дахь Увсынхны нэгдэл. Нам өөр ч тэд маш эв нэгдэлтэй, Ч.Хүрэлбаатар, Б.Чойжилсүрэн хоёрыг эс тооцвол өөр хоорондоо толхилцоод байдаггүй. АН-ын шинэ дарга О.Цогтгэрэлийн хувьд UBS-ынхны нэг. АН дахь Х.Баттулгын эсрэг фракциудын дэмжлэгээр тэрбээр намын дарга боллоо. Харин одоо Монголын улс төрийн газрын зураг өөрчлөгдөнө.

 Ерөнхийлөгч У.Хүрэлсүх 2025 оны гуравдугаар сард Чех улсад төрийн айлчлал хийсэн. Энэхүү айлчлалын бүрэлдэхүүнд МАН-ын Ерөнхий нарийн бичгийн дарга Я.Содбаатар, АН-ын тэргүүн дэд дарга С.Баярцогт нар багтсан. Сүүлийн үед улстөрчид нууц уулзалтаа хилийн чинадад очиж хийдэг “мода” дэлгэрчихээд байгаа. Тэр ёсоор Ч.Содбаатар, С.Баярцогт нар уулзсан. Энэхүү уулзалтаас хойш хоёр сарын дараа буюу өнгөрсөн тавдугаар сараас Л.Оюун-Эрдэнийг Ерөнхий сайдаас огцруулах операци эрчимжиж, Төрийн ордон, МАН-ын байранд ихээхэн доргилт болсон. Л.Оюун-Эрдэнэ огцрохоосоо хэдхэн цагийн өмнө УИХ-ын чуулган дээр “Намайг Гашуунсухайт руу яваад ирэхэд хамтарсан Засгийн газрыг огцруулах зураг зурагдчихсан байсан” гэж мэдэгдсэн. Гэхдээ Я.Содбаатар, С.Баярцогт нарын Прагад хийсэн уулзалтыг тооцвол энэ зургийг тэд бүр өмнө нь зураад гар барьчихсан байсан гэсэн үг.

    АН-ын шинэ даргын төлөөх марафоны үеэр Х.Баттулгынхны зүгээс “Олигархиуд манай намыг МАН-д зарж иддэг болсоор удлаа” гэж мэдэгдсэн. Үнэн. АН-ыг МАН-д зарж, эрх баригч хүчинтэй наймаалцах эрхийн төлөөх энэ удаагийн тулааныг С.Баярцогт удирдлаа. Түүний найз, ТЕГ-ын дарга асан, өдгөө АН-ын ҮБХ-ны Б.Хурц медиа гол дүрд нь тоглож “Х.Баттулга намынхаа хуралд оролцох нүүргүй” гэж мэдэгдлээ. Ерөнхийлөгч У.Хүрэлсүхийн зүгээс О.Цогтгэрэлийг АН-ын дарга болгох “виз” өгч, С.Баярцогтын “Гранд Монгол”-ын шүхэр дор нэгдсэн фракциуд хүчтэй дэмжлэг үзүүлэв. С.Баярцогтын хувьд, “MCS-ийнх” гэгддэг бол түүний найз, “АПУ”-ийн П.Батсайханы NTV телевиз АН-ын даргад нэр дэвшигчдийн мэтгэлцээнийг үзэгчдэд толилуулж медиа туслалцаа үзүүлэв. “АПУ” П.Батсайханы тухайд, С.Баярцогтыг хууль хяналтын байгууллагад шалгагдаж байх үед шүүгчидтэй хийсэн нууц уулзалтуудад нь хамт явсан гэх мэдээлэл хэвлэлд гарч байсан. Монголын улс төрд ийнхүү нэн шинэ МАНАН байгуулагдлаа.

 Шинэн МАНАН-ыг У.Хүрэлсүх, С.Баярцогт нар удирдана. Ерөнхий сайд асан Ч.Сайханбилэг ч Монголд удахгүй ирнэ. С.Баярцогт, Ч.Сайханбилэг нар У.Хүрэлсүхийг Австралид амьдарч байхад очиж уулзсан талаар тухайн үед хэвлэлүүд мэдээлж байв. Нам өөр ч тэд нэг үеийн найзууд. “Оросыг сайн маажвал герман” гэдэг шиг С.Баярцогт, Ч.Сайханбилэг хоёр бол КОМСОМОЛЧИД. Тэд энэ удаад Х.Баттулгын эсрэг нэг блок болж, нэн шинэ МАНАН-г байгууллаа. У.Хүрэлсүх, Ц.Элбэгдорж нарын хамт авахуулсан зураг сошиалд түгсэн нь бас нэгийг хэлнэ биз.

Ерөнхийлөгч У.Хүрэлсүх “Намайг Ерөнхийлөгч байхад Үндсэн хуульд дахиж нэмэлт өөрчлөлт хийхгүй” гэж хэдэнтээ мэдэгдсэн. Л.Оюун-Эрдэнийг Ерөнхий сайдаас огцруулсан УИХ-ын чуулганы индрээс ч энэхүү мэдэгдлээ давтаж хэлсэн. Гэвч улс төрд өглөө ярьсан зүйлс хэдхэн цагийн дараа өөрчлөгддөг нь цөөнгүй. АН-ын шинэ дарга тодорч, улс төрийн зураг өөрөөр зурагдаж буй энэ мөчид “У.Хүрэлсүх мэдэгдлээсээ буцаж 2027 оны Ерөнхийлөгчийн сонгуульд нэр дэвших үү” гэдэг асуулт гарч ирэв. “Үндсэн хуульд нэмэлт өөрчлөлт хийхгүй” гэх түүний удаа дараагийн мэдэгдэлтэй зэрэгцэн “Ерөнхийлөгчийн сонгуульд дахин нэр дэвших санаа У.Хүрэлсүхэд байсан...” гэх яриа улс төрд өрнөсөн. Яг одоо сошиалд “О.Цогтгэрэл АН-ын дарга боллоо. МАН, АН хамтарсан Засгийн газар байгуулах нь дээ” гэх таамаг хөвөрч байна. О.Цогтгэрэл АН-ын дарга болохынхоо өмнөхөн “АН Засгийн газарт хамтрахыг зөв гэж боддоггүй. Гэхдээ нам бол дарга биш, олон нийтийн байгууллага. Намын шийдвэрийг дарга нь ч биелүүлэх үүрэгтэй” гэж ярьсан. МАН-ын Ерөнхий нарийн бичгийн дарга Я.Содбаатарын мэдэгдсэнээр, эрх баригчид намынхаа их хурлыг ирэх есдүгээр сард хийнэ. Энэ хурлаар Л.Оюун-Эрдэнэ МАН-ын даргын тамгыг Г.Занданшатарт гардуулна. Г.Занданшатар МАН-ын дарга болж, Засгийн газартаа сэлгээ хийнэ. Тэр үеэр АН-ыг танхимдаа урих уу гэдэг асуулт ч бас гарч ирж байгаа юм. Өнгөрсөн сонгуулиар МАН-ын дэмжлэгээр УИХ-д дөрвөн суудалтай болсон ИЗНН-ынхан Г.Занданшатарын Засгийн газраас гарч ч магадгүйгээ зарлачихсан... Ямартай ч У.Хүрэлсүх, С.Баярцогт нар нэн шинэ МАНАН байгуулж, 2027, 2028 оны сонгууль угтсан улс төрийн газрын зургийг хамт зурж эхэллээ.  

С.Тулга