Л.Оюун-Эрдэнийн оронд У.Хүрэлсүхийн экс хүргэн Б.Пүрэвдагва энд гарч ирэв

АН О.Цогтгэрэл гэдэг шинэ даргатай боллоо. Харин МАН-ынхан их хурлаа есдүгээр сард хийж, намын даргаа сонгох талаар тус намын генсек Я.Содбаатар мэдэгдсэн. Л.Оюун-Эрдэнийг УИХ-ын олонхийн саналаар огцруулах мөчөөс эхлэн эрх баригч хүчинд У.Хүрэлсүхийнхэн ба Л.Оюун-Эрдэнийнхэн гэсэн хуваагдал ил болсон. Ерөнхий сайд Г.Занданшатарыг танхимаа ч бүрдүүлж амжаагүй байхад Л.Оюун-Эрдэнийн талын 30 гишүүн буюу Ч.Номин, Э.Болормаа тэргүүтэй “1 А”-ийнхан өрөөнийх нь өмнө эгнэн сууж шаардлага хүргүүлсэн. Нэрэн дээрээ “Нас, хүйс харгалзалгүй мэргэжлийн хүмүүсийг сайдаар томил” гэсэн утгатай ч нэдэр дээрээ У.Хүрэлсүх, Г.Занданшатар нарын эсрэг хийсэн акци байв. Л.Оюун-Эрдэнэд УИХ дахь олонхи “Итгэл үзүүлэхгүй” гэдэг санал өгч огцруулснаас хойш яг гурван сар өнгөрлөө. Экс Ерөнхий сайд “Том ах” Х.Баттулгынхаа араас орж, УИХ-ын чуулган тасалдаг гишүүдийг тэргүүлэх болсон. Харин хилийн чинадаас Монголд ирж, Төрийн ордон хийгээд орон нутагт МАН, АН-ынхантай уулзаж яваа.

Л.Оюун-Эрдэнэ удахгүй болох МАН-ын их хурлаар намын даргын ажлаа өгөх ёстой. Тодруулбал, Ерөнхий сайд Г.Занданшатарт тамгаа гардуулах учиртай. Гэвч түүнд өөр төлөвлөгөө байгаа бололтой. МАН-ын даргын суудлыг наяад оныхонд, тодруулбал найзууддаа шилжүүлж, улс төр дэх эрх мэдлээ хадгалж үлдэхийг хичээж байна. Нэг ёсондоо, ажиглагчид Д.Амарбаясгаланг “МАН-ын сүүдрийн генсек” гэж байгаачлан Л.Оюун-Эрдэнэд ч бас эрх баригч хүчний сүүдрийн дарга болох хүсэл бий. Гэвч У.Хүрэлсүхийн талынхан Л.Оюун-Эрдэнэ тэргүүтэй наяад оныхны өөдөөс 90-ээд оны өөр нэгэн дүр гаргаж ирэв. Тэр бол У.Хүрэлсүхийн экс хүргэн, СДМЗХ-ны ерөнхийлөгч Б.Пүрэвдагва. Тэрбээр МАН-ын дэргэдэх залуучуудын байгууллагын ерөнхийлөгчийн тамгыг УИХ-ын гишүүн Н.Учралаас хүлээн авч байсан юм. Харин саяхан Ерөнхий сайд Г.Занданшатарыг залуустай хийх уулзалтынхаа анхны зочноор урьж, “Рио парк”-т “Татвар” гэдэг сэдвээр өрнөсөн ярилцлагыг нь зохион байгууллаа. Нэг ёсондоо, Л.Оюун-Эрдэнийн оронд МАН дахь 90-ээд оны төлөөлөл болсон Б.Пүрэвдагва энд гарч ирэв. Монгол Улсын Ерөнхийлөгчийн 2017 оны сонгуульд МАН-аас М.Энхболд нэр дэвших үеэр Л.Оюун-Эрдэнэ Явуугийн цэцэрлэгт хүрээлэнд залуустай хийсэн уулзалтыг нь хөтөлж байв. Гэвч Х.Баттулга ялж, М.Энхболд ялагдсан. Түүгээр ч зогсохгүй Л.Оюун-Эрдэнэ “Шударга 5”-аа оройлон манлайлж, М.Энхболдыг эрх мэдлийн сэнтийгээс буулгаж байлаа. М.Энхболд явж, Л.Оюун-Эрдэнийн эрин үе эхэлсэн. У.Хүрэлсүхийн хүч, нөлөөгөөр Ерөнхий сайдын суудалд заларсан тэрбээр мөн л У.Хүрэлсүхийн буулга дор гүйцэтгэх засаглалын тэргүүнээс огцорсон. Л.Оюун-Эрдэнийн оронд Б.Пүрэвдагва Ерөнхий сайд Г.Занданшатарын хажууд суулаа. МАН дахь 1980, 1990-ээд оныхны дунд эрх мэдлийн тулаан хэрхэн өрнөх бол…

С.Тулга